जिपको ठक्करले सहपाठीको मृत्यु भएपछि विद्यार्थीद्वारा सडक अवरुद्ध

काठमाडौं । जिपको ठक्करले सहपाठीको मृत्यु भएपछि कोटेश्वर मल्टिपल क्याम्पसका विद्यार्थीले जावलाखेलमा सडक अवरुद्ध पारेका छन् । दोषीलाई कारबाही गर्नुपर्ने उनीहरूको माग छ ।
बुधबार बिहान सोही क्याम्पसमा स्नातक पहिलो वर्षमा अध्ययनरत १९ वर्षीया अञ्जु दाहाललाई नक्खु, बागडोलमा जिपले ठक्कर दिएको थियो । उनको घटनास्थलमै मृत्यु भएको थियो ।
ठक्कर दिएपछि जिपले ‘ब्याक’ गरेर मारेको विद्यार्थीले आरोप लगाएका छन् । बाटो छेकेर प्रदर्शन गरिरहेका उनीहरूले आफ्नी साथीको हत्या भएको भन्दै जिप चालकलाई कारबाही गर्नुपर्ने माग गरेका छन् । दाहाललाई बिहान ६ बजेतिर स१ज ५६७ नम्बरको जिपले ठक्कर दिएको थियो । जिप चालक प्रवीण गिरीलाई पक्राउ गरिसकिएको महानगरीय प्रहरी परिसर ललितपुरले जनाएको छ ।