काठमाडाैँ । शहीद स्मारक ‘बी’ डिभिजन लिग फुटबलमा पुल्चोक स्पोर्ट्स क्लबले पहिलो जीत निकालेको छ ।
सोमबार भएको खेलमा रानीपोखरी कर्नर टिम आरसिटीलाई दुईका विरुद्ध एक गोल अन्तरले पराजित गर्दै पुल्चोकले पहिलो जीत निकालेको हो ।
एन्फा कम्प्लेक्स सातदोबाटोमा पुल्चोकलाई जीत दिलाउन अर्जुनकुमार राना र किस्मत लिम्बुले एक एक गोल गरे । आरसिटीका अमर डंगोलले एक गोल फर्काए ।
खेलको पाँचौं मिनेटमा अर्जुनले गोल गर्दै पुल्चोकलाई अग्रता दिलाएका थिए । तर, ४३ औं मिनेटमा अमरले गोल गर्दै आरसिटीलाई एकका विरुद्ध एक गोलको बराबरीमा फर्काए ।
त्यसपछि खेलको ७७ औं मिनेटमा किस्मतले गोल गर्दै पुल्चोकलाई दुईका विरुद्ध एक को जीत दिलाए । जीतसँगै पुल्चोकले १० खेलमा ५ अंक जोडेको छ ।