कक्षा १२ को परीक्षा जेठ २६ देखि हुने

काठमाडौं । कक्षा १२ को परीक्षा २०७७ जेठ २६ गतेदेखि सञ्चालन हुने भएको छ ।

राष्ट्रिय परीक्षा बोर्डको आजको बैठकले कक्षा १२ को परीक्षा सञ्चालनको मिति निर्धारण गरेको हो । परीक्षा नियन्त्रक रामराज खकुरेलका अनुसार १२ को अन्तिम परीक्षा जेठको २६ देखि असार ४ गतेसम्म गर्ने निर्णय गरिएको छ ।

बोर्डले परीक्षा मिति तय गरेसँगै प्रश्नपत्र निर्माण र परीक्षा केन्द्र निर्धारणको काम द्रुत गतिमा अघि बढाइने भएको छ । कतिपय जिल्लाले परीक्षा केन्द्र निर्धारण गरिसकेको र कतिपय जिल्लामा जारी रहेको बताइएको छ ।

कोभिड–१९ का कारण पठनपाठन नभएपछि यस वर्ष परीक्षा दुई महिना ढिलो हुने भएको हो । विगतका वर्षमा परीक्षा वैशाख हुँदै आएको थियो ।