काठमाडौं । प्रमुख प्रतिपक्षी दल नेपाली कांग्रेसका प्रवक्ता विश्वप्रकाश शर्माले प्रधानमन्त्री केपी शर्मा ओलीले फेरि ‘बहुमत छ’ भनेर दाबी गर्दा दुनियाँ हासेको टिप्पणी गरेका छन् ।
नेकपा एमालेका अध्यक्ष समेत रहेका प्रधानमन्त्री ओलीले आफूसँग १५३ जना सांसद्को रहेको भन्दै पुनः प्रधानमन्त्रीमा दाबी गरेपछि प्रवक्ता शर्माले उक्त टिप्पणी गरेका हुन् ।
शुक्रबार साँझ ट्वीट गर्दै उनले भनेका छन्- ‘बहुमत छैन’ भनेर विश्वासको मतबाट भागेका प्रधानमन्त्रीले ‘बहुमत छ’ भनेर फेरि दाबी गर्दा दुनियाँ हाँसेको छ ! लाज स्वयं लजाएको छ !
उनले राष्ट्रपतिलाई समेत अलमलमा नपरीकन संस्थाको गरिमा जोगाउन समेत सुझाव दिएका छन् । शर्माले लेखेका छन्– राष्ट्रपति महोदया ! सतिसालको शिरमा हुनुपर्ने यहाँप्रतिको श्रद्धा बकैनाको फेदमा झरिसक्यो । अलमलको गोलमालमा संस्थाको गरिमा ओह्रालो अझै कति लगाउनु हुन्छ ?
शुक्रबार बालुवाटारमा आयोजित पत्रकार सम्मेलनमा प्रधानमन्त्री ओलीले दलहरूलाई वैकल्पिक सरकार बनाउन आग्रह गरेका थिए । प्रधानमन्त्री ओलीले भनेका थिए- ‘आज बिहान देउवाजीलाई भनें, सरकार बनाउनुस्, म शान्त भएर प्रतिपक्षमा बस्छु ।’
`बहुमत छैन´ भनेर विश्वासको मतबाट भागेका प्रधानमन्त्रीले `बहुमत छ´ भनेर फेरि दाबि गर्दा दुनियाँ हांसेको छ ! लाज स्वयं लजाएको छ !
रास्ट्रपति महोदया ! सतिसालको शिरमा हुनुपर्ने यहाँप्रतिको श्रद्धा बकैनाको फेदमा झरिसक्यो l अलमलको गोलमालमा संस्थाको गरिमा ओह्रालो अझै कति लगाउनु हुन्छ ?
— Bishwa Prakash शर्मा (@bishwaprakash77) May 21, 2021
