काठमाडौं । नेकपा एमालेले नेकपा माओवादी केन्द्र परित्याग गरी एमाले प्रवेश गरेका नेतालाई समेटेर स्थायी कमिटी विस्तार गरेको छ । तर, यसपटक पनि नेता प्रभु शाह भने स्थायी कमिटीमा अटाउन सकेनन् ।
आज बसेको १०औं महाधिवेशन कमिटीको अन्तिम बैठकले रामबहादुर थापा ‘बादल’, टोपबहादुर रायमाझी, लेखराज भट्ट र मणी थापालाई स्थायी कमिटी सदस्य बनाएको छ । एमालेले स्थायी कमिटीमा पूर्व माओवादीबाट चार, एमाले ओली समूहबाट दुई र माधवकुमार नेपाल समूहबाट २ जना सदस्य थपेको थियो ।
यस अगाडि बैशाख १० गते शुक्रबार बसेको महाधिवेशन आयोजक कमिटी बैठकले १९ सदस्यीय स्थायी कमिटी विस्तार गर्दा पनि पूर्व माओवादीका चार नेतालाई स्थायी कमिटीमा समावेश गरेको एमालेले शाहलाई छुटाएको थियो ।
तर, सर्वोच्च अदालतले एमालेको १०औं राष्ट्रिय महाधिवेशन आयोजक कमिटी खारेज गरेपछि पुरानै केन्द्रीय कमिटीमा फर्कदा थप गरेको स्थायी कमिटीमा समेत शाह नअटाएका हुन् ।
शाहले ओली नेतृत्वकै सरकारमा शहरी बिकासमन्त्री भएर काम गरेका थिए । दल परित्याग गरेका कारण सांसद पद खोसिएपछि मन्त्रीबाट बिदा भएका शाहलाई प्रधानमन्त्री ओलीले पुनः मन्त्री नियुक्त गरेका थिए । तर, सर्वोच्चले सांसद नभएकालाई मन्त्री बनाउन नमिल्ने फैसला गरेपछि शाहको मन्त्री पद खोसिएको थियो ।
एमाले–माओवादी एकतापूर्व शाह माओवादीको कार्यालय सदस्य थिए । मधेशमा राम्रो पकड भएका शाह भने एमालेको स्थायी कमिटीमा नअटाएका हुन् ।
