काठमाडौं । त्रिभुवन विश्वविद्यालयमा आजबाट स्नातक तहको पहिलो वर्षको वार्षिक परीक्षा सुरु भएको छ । कोरोना महामारीका कारण झण्डै दुई वर्षदेखि रोकिएको परीक्षा आजदेखि भौतिक रुपमा सुरु भएको हो ।
आजबाट बीए, बीएड र बीएससीतर्फका चार वर्षे/तीन वर्षे परीक्षा शुरु भएको परीक्षा नियन्त्रक पुष्पराज जोशीले बताए । उनका अनुसार भोलिबाट व्यवस्थापन संकायका परीक्षाहरु शुरु हुनेछन् । ‘रेगलुर र आंशिक सबै परीक्षा सुरु गरेका छौं,’ परीक्षा नियन्त्रक जोशीले भने, ‘विद्यार्थीहरु अलमोस्ट सबै सहभागी भएका छन् ।’
कोरोना महामारीका कारण त्रिविले अनलाइन प्रणालीबाट परीक्षा फारम भर्ने व्यवस्था मिलाएको थियो । तर, प्रवेशपत्र प्रिन्ट गर्ने बेला फोटो र पूरा विषय नआएको, केन्द्र परिवर्तन नभएको जस्ता समस्या परीक्षार्थीहरुले भोगेका छन् ।
परीक्षा नियन्त्रक जोशीले अहिले नागरिकता वा परिचय खुल्ने अन्य परिचयपत्र हेरेर सहज रुपमा परीक्षा दिने व्यवस्था मिलाउन केन्द्राध्यक्षहरुलाई भनिएको र नमिलेका अन्य कुराहरु विद्यार्थीहरुको निवेदनको आधारमा मिलाइने बताए ।
