काठमाडौं । सरकार राजनीतिक दलसम्बन्धी अध्यादेश ल्याउने तयारीमा छ । सोहीअनुसार घटनाक्रमले तीब्रता पाएको छ ।
प्रधानमन्त्री शेरबहादुर देउवाले आकस्मिक मन्त्रिपरिषद बैठक बोलाएका छन् । प्रधानमन्त्रीको सरकारी निवास बालुवाटारमा जारी मन्त्रिपरिषद बैठकले राजनीतिक दलसम्बन्धी अध्यादेश ल्याउने तयारी रहेको बुझिएको छ ।
सरकारले सोही अध्यादेश ल्याउने उद्देश्यका साथै सोमबार मध्यरातदेखि लागू हुने गरी संसद अधिवेशन अन्त्य गरेको थियो ।
मन्त्रिपरिषद बैठकअघि काँग्रेस सभापतिसमेत रहेका प्रधानमन्त्री देउवाले काँग्रेस नेताहरुसँग परामर्श गरेका थिए । वरिष्ठ नेता रामचन्द्र पौडेल, पूर्वमहामन्त्री कृष्ण प्रसाद सिटौला, महामन्त्रीद्वय शशांक कोइराला र पूर्णबहादुर खड्कासँग प्रधानमन्त्री देउवाले अध्यादेशबारे छलफल गरेका थिए ।
सरकारले नेकपा एमालेका वरिष्ठ नेता माधवकुमार नेपाललाई पार्टी विभाजन गर्न सहज हुनेगरी अध्यादेश ल्याउने तयारी गरेको हो ।
