काठमाडाैं । नेकपा एमाले स्थायी कमिटी सदस्य तथा लुम्बिनी प्रदेशका निवर्तमान मुख्यमन्त्री शंकर पोखरेलले अध्यादेश ल्याएर एमाले विभाजन गराउने खेलमा प्रचण्ड लागेकाे आरोप लगाएका छन् ।
नेकपा एमाले बुटवल उपमहानगरले बुधवार आयोजना गरेको कार्यक्रमलाई सम्बोधन गर्दैै नेता पाेखरेलले तत्कालीन नेकपाभित्रको राजनीतिक संकट निम्त्याउने पात्र माओवादी केन्द्रका अध्यक्ष पुष्पकमल दाहाल ‘प्रचण्ड’ नै भएको आरोप लगाए । ‘नेकपादेखि अहिलेको राजनीतिक घटनाको पृष्ठभूमि प्रचण्ड र उनलाई साथ दिनेहरू हुन्,’ उनले भने ।
उनले प्रचण्डको अस्थिर चरित्र नै राजनीतिक रूपमा विभाजनको मूल कारक रहेको बताए । ‘आन्दोलनकारी, अभियान्ता जस्तो देखिनुभयो प्रचण्डजी, त्यसैले माओवादी आन्दोलनका पुराना नेताहरू पाखा लाग्नुभएको रहेछ,’ उनले भने ।
उनले नेकपा एकतामा समेत प्रचण्ड इमान्दार नदेखिएको बताउँदै केपी ओलीलाई एकताविरोधी बनाउन खोजिएको बताए । अध्यादेश ल्याएर एमाले विभाजन गराउने खेलमा समेत प्रचण्ड लागेको नेता पोखरेलको आरोप छ ।
पाेखरेलले माधव नेपालकै कारण पार्टी फुटेकाे ठाेकुवा गरे । माधवकुमार नेपालले एमालेलाई १५ वर्षसम्म एकल नेतृत्व गरेको बताउँदै त्यस्तो नेताले अध्यक्ष हुन खोजेपछि नै समस्या सिर्जना भएको बताए । उनले प्रचण्डसँग मिलेर माधव नेपालले केपी ओलीलाई राजनीतिक रूपमा विस्थापन गर्न खोज्नु नै कम्युनिस्ट आन्दोलनको दुर्भाग्य भएको बताए ।
केपी शर्मा ओलीले पार्टीभित्रको अन्तरसंघर्षकै कारण प्रतिनिधिसभा विघटन गर्नुपरेको बताए ।एमालेका अधिकांश नेताहरूले विकल्प नै नभएर प्रतिनिधिसभा विघटन गरेको बताउने गरेका छन् ।
