भैरहवा । आन्तरिक राजश्व विभागले मदिरामा लगाइएको नक्कली राजश्वको स्टिकरबारे अनुसन्धान बढाएपछि भैरहवास्थित क्रिष्टल डिष्टिलरीले आफ्ना डिलरमार्फत नक्कली स्टिकल टाँसिएको मदिरा लुकाउन थालेको छ ।
विभागले अनुसन्धान थालेपछि भैरहवा नजिकैको बोर्डर कक्रहवाको डिलरमार्फत सयौं कार्टुन नक्कली स्टिकर टाँसिएको रक्सी गोदामबाट क्रिष्टलले अन्तै सारेको छ ।
अनुसन्धानको क्रममा विभागले क्रिष्टल डिष्टिलरीको कार्यालयमा डिष्टिलरीले उत्पादन गरेको विभिन्न ब्राण्डका रक्सीमा नक्कली स्टिकर फेला पारेको थियो ।
केही दिन अगाडि मत्र आन्तरिक राजश्व कार्यालय भैरहवाले नवलपरासीको दिक्षा स्टोरमा छापा मार्दा स्टार सोफी ब्राण्डका ५० कार्टुन मध्ये २९ कार्टुन रक्सीमा नक्कली स्टिकर फेला परेको थियो ।
विभागले शनिबार मात्र क्रिष्टलको भैरहवास्थित कार्यालयमा छापा मारेर अकाउन्टेन्टको ल्यापटप बरामद गर्नुको साथै कार्यालय सिल गरेको थियो ।
