काठमाडौं । नेकपा एमालेका नेता रामबहादुर थापा ‘बादल’ले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र माधवकुमार नेपाललाई दक्षिणपन्थीको संज्ञा दिएका छन् । पूर्वमाओवादी नेता बादलले बिहीबार एमाले काठमाडौ कार्यकर्ता भेलालाई सम्बोधन गर्दै यस्तो आरोप लगाएका हुन् ।
पार्टीभित्रका दक्षिणपन्थी र अदालतको परमादेशका कारण एमाले सत्ताबाहिर जानुपरे पनि वर्ग संघर्षको माध्यमबाट फेरि राज्यसत्तामा आइपुग्ने दावी गर्दै उनले प्रचण्ड र माधवहरु पुँजिवादीहरूको सहकार्यमा कम्युनिष्ट पार्टीको नेतृत्वलाई सरकारबाट अपदस्त गरेको आरोप लगाए ।
बादलले भने, ‘आज राजनीतिक रूपमा हामी सत्ताबाहिर पुगेका छौँ । तर, पार्टीभित्रका दक्षिणपन्थी विसर्जनवादीहरू पार्टीबाट अलग भएका छन् । हामी वर्ग संघर्षको माध्यमबाट एमालेको नेतृत्वमा पुनः सत्तामा आउनेछौँ ।’ उनले एमालेको बयान गर्दै आगामी चुनावमा सबै तहका सरकारको नेतृत्व लिइने दावी गरे ।
