काठमाडौं । नेपाली कांग्रेसका सभापति तथा प्रधानमन्त्री सभापति शेरबहादुर देउवाले गजेन्द्रबहादुर हमाल आफ्नो पार्टीको मान्छे भएको स्पष्ट पारेका छन् ।
प्रधानन्यायाधीशको कोटामा मन्त्री बनाइएको भनिएका हमाल आफ्नो पार्टीको मान्छे भएको देउवाले स्पष्ट पारेका हुन् । नेपाल तरुण दलले बुधबार सरकारी निवास बालुवाटारमा आयोजना गरेको कार्यक्रममा बोल्दै प्रधानमन्त्री देउवाले भने, ‘मैले तपाइँहरुलाई भनेको भन्यै छु । हमाल हाम्रो पार्टीको मान्छे हो । विचरा, बस्न नसक्ने भएपछि राजीनामा दिए ।’
प्रधानमन्त्री देउवाले पछिल्लो समय अदालतमा देखिएको समस्या समाधान गर्ने काम अदालतकै भएको समेत बताउँदै यसबारे गठबन्धनमा छलफल गर्ने बताए ।
प्रधानमन्त्री देउवाले एमाले अध्यक्ष केपी शर्मा ओलीले परमादेश गर्ने सबै न्यायाधीशलाई राजीनामा गर्नुपर्ने भनी दिएको अभिव्यक्तिको आलोचना गरे । उनले भने, ‘परमादेश ल्याउने सबैलाई हटाउनु पर्दछ भन्ने गैरजिम्मेवार कुरा गर्नु उचित हुँदैनजस्तो लाग्छ मलाई । अरु कुरा धेरै केही भन्नुछैन । हाम्रो गठबन्धन पाँच पार्टीको जो छ, जे उठेका सवालहरू छन्, त्यस सम्बन्धमा छलफल गर्नेछौँ ।’
प्रधानमन्त्री देउवाले परमादेशबाट संसदीय व्यवस्था, संविधान र सिंगो देशलाई बचाउने काम अदालतका न्यायाधीशहरुले गरेको दाबी गर्दै त्यसको विरोध नगर्न समेत एमाले अध्यक्ष ओलीलाई सचेत गराए ।
