काठमाडौं, २४ बैशाख ।
प्रमुख प्रतिपक्षी दल नेपाली कांग्रेसको होहल्ला र अवरोधका बीच सरकारले आगामी आर्थिक वर्षका लागि ल्याएको नीति तथा कार्यक्रम बहुमतले पारित भएको छ । संघीय संसदमा पेश भएको सरकारको नीति तथा कार्यक्रम ध्वनि मतका आधारमा पारित भएको सभामुख कृष्णबहादुर महराले घोषणा गरेका हुन्।
प्रमुख प्रतिपक्ष नेपाली कांग्रेस, राष्ट्रिय जनता पार्टी नेपाल र स्वतन्त्र सांसदहरुले नीति तथा कार्यक्रमको विपक्षमा मत दिए । नीति तथा कार्यक्रममाथि नेपाली कांग्रेस, राजपालगायतका दलका सांसदले राखेको संशोधन प्रस्ताव बहुमतले अस्वीकृत भएको थियो ।
कांग्रेसका सांसदको चर्को विरोधकाबीच पनि पनि सभामुखले नीति तथा कार्यक्रम निर्णयार्थ पेश गरेका थिए ।
संसदमा नीति तथा कार्यक्रममाथि छलफलका क्रममा उठेका प्रश्नको जवाफ दिने क्रममा प्रधानमन्त्री केपी शर्मा ओलीले वेवास्ता गरेपछि प्रतिपक्षी दल नेपाली कांग्रेसले संसद अवरोध समेत गरेको थियो ।
प्रधानमन्त्रीले प्रश्नहरुको जवाफ दिने क्रममा भनेका थिए– ‘म यहाँ केही आक्रोश, कुण्ठा र निम्छरा प्रश्न छोडेर अन्य प्रश्नको जवाफ मात्र दिन्छु ।’ सभामुख कृष्णबहादुर महराले प्रतिपक्षी दल कांग्रेसका सांसदहरुलाई पटक पटक बस्न आग्रह गर्दा पनि उनीहरुले मानेका थिएनन् ।
वैशाख २० गते राष्ट्रपति विद्यादेवी भण्डारीले प्रस्तुत गरेको नीति तथा कार्यक्रममाथि संसदमा आइतबार, सोमबार र मंंगलबार गरी तीन दिन छलफल भएको थियो । प्रतिनिधिसभाको अर्को बैठक बैशाख २७ गते बिहान ११ बजेका लागि बोलाइएको छ ।
