काठमाडौं । जनता समाजवादी पार्टी (जसपा) का अध्यक्ष उपेन्द्र यादवले गणतन्त्रलाई समाप्त पार्ने षड्यन्त्र भइरहेकाप्रति सबै सजग रहनुपर्ने बताएका छन् ।
जसपा नेपाल महोत्तरीद्वारा लोहरपट्टिमा आयोजित पार्टी प्रवेश कार्यक्रममा उनले बलिदानीपूर्ण संघर्षबाट प्राप्त संघीय लोकतान्त्रिक गणतन्त्रको रक्षाका लागि आफूहरु सजग रहेको बताए ।
जनआन्दोलन र मधेस आन्दोलनको जगमा स्थापित संघीय लोकतान्त्रिक गणतन्त्रलाई समाप्त पार्ने षड्यन्त्र भइरहेकाप्रति सबै सजग रहनुपर्ने उनले उल्लेख गरे ।
संघीययता र गणतन्त्र समाप्त पार्ने प्रयासलाई आफूहरुले एकपटक असफल तुल्याइसकेको भए पनि खतरा अझै कायमै रहेको उनको भनाइ थियो । अध्यक्ष यादवले संघीय लोकतान्त्रिक गणतन्त्रको रक्षाको जिम्मेवारी मधेसी जनताको काँधमा आएको बताए । ‘संघर्षको यात्रा अझै जारी छ,’ उनले भने ।
प्रदेश २ का मुख्यमन्त्री लालबाबु राउतले प्रदेश सरकारले ल्याएको आरक्षणसम्बन्धी व्यवस्था विश्वकै उत्कृष्ट भएको बताए । आरक्षणको सुविधा प्राप्त गर्न दलित, महिला, मुस्लिमलगायत समुदायले बालबालिकाको शिक्षामा जोड दिनुपर्ने बताए ।
