काठमाडौं । विवेकशील साझा पार्टीले पृथ्वी जयन्तीको अवसर पारेर यही पुस २७ गतेदेखि माघ १६ सम्म गर्ने तय गरेको ‘मेची–महाकाली राष्ट्रिय एकता यात्रा’ स्थगन गरेको छ ।
झापादेखि कञ्चनपुरसम्मका दर्जनौँ स्थानमा अध्यक्ष रवीन्द्र मिश्रसहित नेता सहभागी भई आमसभा र अन्तरक्रिया गर्ने अन्तिम तयारी भइसकेको अवस्थामा पछिल्ला दिनमा ह्वात्तै बढेको कोरोना भाइरस संक्रमणको स्थितिलाई दृष्टिगत गरी पार्टीले यात्रा स्थगन गर्ने निर्णय गरेको साझा पार्टीले जनाएको छ ।
‘पार्टीका कयौँ नेता र सदस्यहरू तीन सातासम्म सँगै लगातार यात्रा र उठबस गर्दा सबै जना सङ्क्रमित हुनसक्ने जनस्वास्थ्य विज्ञहरूको सुझाव, उपचारमा आइपर्ने ठुलो आर्थिक भार एवम् यात्राका क्रममा भेटिने सदस्य, शुभेच्छुक तथा आम नागरिकमा समेत सङ्क्रमण फैलन सक्ने जोखिमलाई गम्भीरतापूर्वक मनन गर्दै यात्रा स्थगित गरिएको हो’ साझा पार्टीद्वारा जारी विज्ञप्तिमा भनिएको छ । साथै, निकट भविष्यमा अनुकूल समय पारेर ‘मेची–महाकाली राष्ट्रिय एकता यात्रा’ गरिने समेत जनाइएको छ ।
यात्रा स्थगित गरिएपनि पुस २७ गते पार्टीको केन्द्रीय कार्यालय बखुण्डोल ललितपुरसहित विभिन्न जिल्लामा स्वास्थ्य मापदण्ड पालना गर्दै औपचारिक कार्यक्रम आयोजना गरेर पृथ्वी जयन्ती तथा राष्ट्रिय एकता दिवस मनाउने पार्टीले निर्णय गरेको विज्ञप्तिमा जनाइएको छ ।
