काठमाडौं । स्वास्थ्य सेवा विभागले कोरोनाविरुद्धको पहिलो मात्रा खोप लगाउन आउने नागरिकहरुलाई कोभिसिल्ड/एस्ट्राजेनिका खोप लगाइदिन स्वास्थ्य कार्यालयहरुलाई निर्देशन दिएको छ ।
विभागले भेरोसिल खोपको मौज्दात देशैभर न्यून भएको भन्दै पहिलो मात्रा लगाउन आउनेहरु सबैलाई कोभिसिल्ड खोप दिन निर्देशन दिएको हो ।
विभागले पहिलो मात्रा लगाउन आउनेहरुलाई कोभिसिल्ड खोप दिने बुधबार निर्णय गरेको हो । विभागले उक्त निर्णय कार्यान्वयन गर्न प्रदेश स्वास्थ्य निर्देशनालय, स्वास्थ्य आपूर्ति व्यवस्थापन केन्द्र र स्वास्थ्य कार्यालयहरुलाई भनेको छ ।
हाल कोभिड १९ विरुद्धको बुस्टर डोज दिने काम भइरहेको छ । अग्रपंक्तिमा खटिने, सार्वजनिक सेवामा खटिने, रोग प्रतिरोधात्मक क्षमता कम भएका र ६० वर्ष माथिका नागरिकहरुलाई बुस्टर डोज दिन सुरु गरिएको हो ।
