वासिंगटन । अमेरिकी राष्ट्रपति जो बाइडेनले दुई देशबीच बढ्दो तनावका बीच युक्रेनमा आक्रमण गरे रुसलाई जवाफदेही बनाइने चेतावनी दिएका छन् ।
बुधबार राष्ट्रपति बाइडनले भने, ‘रुसले युक्रेनमा आक्रमण गरेमा त्यसलाई जवाफदेही बनाइनेछ । यदि उसले युक्रेनमा आक्रमण गर्यो भने यो रुसको लागि विनाशकारी हुनेछ ।’
उनले आफ्ना साझेदार र सहयोगीहरू रुस र यसको अर्थतन्त्रमा गम्भीर क्षति पुर्याउन तयार रहेको समेत बताए । उनले रुसी राष्ट्रपति भ्लादिमिर पुटिनलाई यस्तो आक्रमण हुँदा महत्वपूर्ण आर्थिक परिणाम भोग्नुपर्ने चेतावनी समेत दिए ।
रुसले युक्रेनमा थप गतिविधि गरेमा आफूले वाचा गरेको कडा प्रतिबन्ध लगाउनले र जुन कसैले कहिल्यै नदेखेको अवस्था आउने बाइडेनको चेतावनी रहेका छ । तर, त्यो रुसको गतिविधि र युक्रेनमा गर्ने आक्रमणको स्तरमा भरपर्ने उनको भनाइ छ ।
‘मैले पहिले नै युक्रेनीहरूलाई अमेरिकी डलर ६०० मिलियन भन्दा बढी मूल्यको परिष्कृत रक्षा उपकरणहरू पठाइसकेको छु । रूसीहरूका लागि यो महँगो पर्नेछ’ उनले भने । युक्रेनको सीमामा पुटिनले आफ्ना एक लाख सेनालाई जम्मा गरिसकेको अमेरिकाको बुझाइ छ ।
‘उनी के गर्न गइरहेका छन् भन्ने कुरामा म यत्ति निश्चित छैन । मेरो अनुमान छ कि उनी भित्र जान्छन् । उनले केही गर्नुपर्छ’, बाइडेनले सोभियत पछिको संसारमा सान्दर्भिकता खोज्ने नेताको वर्णन गर्दै भने, ‘उनी चीन र पश्चिम बीचको संसारमा आफ्नो स्थान खोज्ने प्रयास गर्दैछन् ।’ राष्ट्रपति बाइडेनले आफ्नो कार्यकालको पहिलो वर्षको अवसरमा औपचारिक पत्रकार सम्मेलनमा उक्त टिप्पणी गरेका हुन् ।
