काठमाडौं । नेकपा एमालेका उपमहासचिव प्रदीप ज्ञवालीले एमसीसीलाई लिएर गठबन्धन दलले भूराजनीतिक द्वन्द्व निम्त्याउन खोजेको आरोप लगाएका छन् ।
युवा संघले बुधबार काठमाडौंमा आयोजना गरेको स्थानीय तह निर्वाचन, संवैधानिक व्यवस्था र अबको राजनीति विषयक खुला बहस कार्यक्रममा बोल्दै ज्ञवालीले मुलुक अनिर्णयको बन्दी बन्दै गर्दा गठबन्धन दलले भूराजनीतिक द्वन्द्व निम्त्याउन खोजेको बताएका हुन् ।
उनले एमसीसी विकास परियोजना मात्र भएको भन्दै अहिले जानीजानी भू राजनीतिक प्रतिस्पर्धाको विषय बनाउने काम उचित नरहेको समेत बताए । ज्ञवालीले जनादेश विपरित बनेको सरकारले मुलुकलाई अस्तव्यस्त बनाउने काम गरेको आरोप लगाए ।
उनले अहिले ताजा जनादेशमा जानुको बिकल्प नरहेको भन्दै सवै निर्वाचनमा एमाले एक्लै लड्न तयार भएको धारणा राखे । उनले अहिलेको गठबन्धन अप्राकृतिक रहेको बताए ।
त्यस्तै कांग्रेस नेता मिनेन्द्र रिजालले एमालेलाई संसदको अवरोध खुलाउन आग्रह गर्दै सभामुखको भूमिका चित्त नबुझे संविधान अनुसार अगाडि बढ्ने बाटो खुला रहेको बताए ।
कार्यक्रममा एमाले नेता महेश बस्नेतले संविधान र लोकतन्त्र बचाउन जेठ ४ गतेभित्र स्थानीय तहको निर्वाचन हुनुपर्ने धारणा राखे ।
