काठमाडौं । अमेरिकी राष्ट्रपति जो बाइडनले यसै साता युरोपमा थप सेना पठाउने पेन्टागनले जनाएको छ । युक्रेनमा रुसी आक्रमणको निरन्तरको चिन्तामाझ दुई हजार सैनिकहरूलाई पोल्याण्ड र जर्मनी पठाइने भएको हो । यस्तै हाल जर्मनीमा रहेका एक हजार सैनिकहरू रोमानियामा खट्नेछन् ।
बीबीसीका अनुसार उक्त अमेरिकी निर्णयलाई रुसले विनाशकार कदम भनेको छ । मस्कोले युक्रेनमाथि हमला गर्ने आफ्नो योजना नभएको जनाएको छ तर उसले युक्रेनी सीमा नजिकै करिब एक लाख हतियारधारी सैनिकहरू तैनाथ गरेको छ ।
रुसले युक्रेनको दक्षिणी क्राइमिया प्रायद्वीपलाई आफ्नो नियन्त्रणमा लिएको र पूर्वी डोनबास क्षेत्रको रक्तपातपूर्ण विद्रोहलाई समर्थन गरेको झण्डै आठ वर्षपछि तनाव पुन चर्केको हो ।
मस्कोले युक्रेन सरकारलाई पूर्वी क्षेत्रमा शान्ति पुनर्स्थापनाका लागि अन्तर्राष्ट्रिय सम्झौताहरू लागु गर्न असफल भएको आरोप लगाएको छ ।
त्यस क्षेत्रमा हालसम्म कम्तीमा १४ हजार मानिसको ज्यान गइसकेको छ र रुस समर्थित विद्रोहीहरूले अधिकांश क्षेत्रहरू नियन्त्रण गरेका छन्।
अहिले खटाइन लागेका अमेरिकी सैनिकहरूले युक्रेनमा लड्ने छैनन् तर अमेरिकी साझेदारको रक्षा सुनिश्चित गर्न काम गर्नेछन् । गत महिना तयारी अवस्थामा राखेका साढे आठ हजार सैनिकहरू बाहेक नै अमेरिकाले यी थप सेनाहरू युरोप पठाउन लागेको पेन्टागनले जनाएको छ । बीबीसी
