काठमाडौं । कमल थापा आफ्नो पुरानै पार्टी ‘राप्रपा नेपाल’का अध्यक्ष बनेका छन् । राष्ट्रिय प्रजातन्त्र पार्टीबाट बाहिरिएपछि नयाँ दल दर्ता गर्ने बताउँदै आएका थापाले पुरानै राप्रपा नेपाल ब्यूँताएका हुन् ।
यसअघि थापाले सोमबार निर्वाचन आयोगमा नयाँ दल दर्ता गर्ने तयारीमा थिए । ‘राप्रपा नेपाल’ थापाले नै स्थापना गरेको पार्टी हो । २०७३ सालमा पशुपतिशम्शेर राणाले नेतृत्व गरेको राप्रपासँग एकता गरेपछि राप्रपा नेपालको अध्यक्ष लाक्पा शेर्पा बनेका थिए । तर, अहिले राष्ट्रिय प्रजातन्त्र पार्टीबाट शेर्पाले थापालाई अध्यक्षमा चयन गरेको बताएका छन् ।
थापाले पुरानै राप्रपा ब्यूँताएपनि राजसंस्थाको एजेण्डा भने नबोक्ने बताएका छन् । उनले आफ्नो पार्टीको मुख्य एजेण्डा हिन्दु राष्ट्र हुने बताएका छन् । हालै सम्पन्न महाधिवेशनमा पराजित भएसँगै थापाले राजसंस्थाप्रति असन्तुष्टि जनाउँदै आएका छन् । अध्यक्षमा पराजित हुनुमा राजसंसस्थाको हात रहेको उनले आरोप लगाउँदै आएका छन् ।
