काठमाडौं । सहिद स्मारक ए डिभिजन लिग फुटबलमा आइतबार दशरथ रंगशालामा भएको खेलमा हिमालयन शेर्पा र न्युरोड टीम एनआरटीले गोलरहित बराबरी खेल्दै अंक बाँडेका छन्।
लिगको दशौं चरणको खेलमा शेर्पाविरुद्ध एनआरटीको लक्ष्य जित निकाल्दै शीर्ष पाँचमा उक्लिने रहे पनि गोल गर्न असफल भयो । त्यसो त खेलमा हिमालयन शेर्पाले केही पकड बनाए पनि एनआरटीविरुद्ध गोल गर्न भने असफल रह्यो । शेर्पाले गरेका केही राम्रा प्रहार एनआरटीका गोलरक्षक अजित प्रजापतिले असफल पारेका थिए ।
प्रतियोगिता अवधिभर एनआरटीले सीमित अवसर मात्र सिर्जना गरेको थियो । त्यस्तै हिमालयन शेर्पाले धेरै प्रहार गरे पनि अफ टार्गेट रहे भने केही केही सट गोलरक्षकले बचाएका थिए । दुवै टीमले गोल गर्न भने सकेनन् ।
दशौं चरणको समाप्तिमा एनआरटी १४ अंक जोडेर लिगको सातौं स्थानमा कायमै रहँदा समान खेलबाट शेर्पा १२ अंकका साथ हिमालयन शेर्पा आठौं स्थानमा कायम रह्यो ।
