बालाजुमा बसको ठक्करबाट दुई पैदल यात्रीको मृत्यु

काठमाडौं । काठमाडौंको बालाजुमा बसको ठक्करबाट दुई पैदल यात्रुको मृत्यु भएको छ । आज ६ बिहान बजेतिर गंगा हलनजिक मिनीबसले पैदल यात्रीलाई ठक्कर दिँदा गम्भीर घाइते भएका उनीहरूलाई अस्पताल लैजादै गर्दा बाटोमै मृत्यु भएको प्रहरीले जनाएको छ ।

मृत्यु हुनेमा रसुवा घर भएका १८ वर्षीय विकास तामाङ र नाम नखुलेकी करिब ५५ वर्षीया महिला रहेको महानगरीय ट्राफिक महाशाखाका एसपी सञ्जीव शर्माले जानकारी दिए । उनका अनुसार बालाजुस्थित गंगा हलअगाडि बाटो काट्ने क्रममा बसले उनीहरूलाई ठक्कर दिएर फरार भएका थिए ।

प्रहरीका अनुसार बसको नम्बर खुल्न सकेको छैन । घटनाबारे अनुसन्धान भइरहेको प्रहरीले जनाएको छ ।