काठमाडौं । आज देशका केही स्थानमा वर्षा र हिमपातको सम्भावना रहेको छ । मौसम पूर्वानुमान महाशाखाका अनुसार आइतबार दिउँसो पहाडी भू–भागको केही स्थानमा मेघगर्जन र चट्याङसहित वर्षा र उच्च पहाडी तथा हिमाली भू–भागमा हल्का हिमपातको सम्भावना रहेको छ ।
त्यस्तै आज राति देशको पहाडी भू–भागमा आंशिकदेखि सामान्य बदली रही बाँकी भू–भागमा मौसम सामान्यतया सफा रहनेछ । महाशाखाका अनुसार पहाडी भू–भागको थोरै स्थानमा भने मेघगर्जन/चट्याङसहित हल्का वर्षाको सम्भावना रहेको छ ।
उच्च पहाडी तथा हिमाली भू–भागका केही स्थानमा हल्का हिमपातको सम्भावना पनि रहेको छ । अहिले देशका पहाडी भू–भागमा आंशिक बदली रहेको महाशााको भनाइ छ। साथै, तराईका केही भू–भागमा हुस्सु र कुहिरो लागेको छ । हाल देशमा पश्चिमी न्यून चापीय प्रणालीको प्रभाव रहेको माहाशाखाले जनाएको छ ।
