काठमाडौं । दक्षिण भारतीय सुपरस्टार प्रभास र पुजा हेग्देको अभिनय रहेको फिल्म ‘राधे श्याम’ रिलीज भएको छ । भारतीय सिनेमाकै महंगो मध्येको एक फिल्म हो ‘राधे श्याम’ । यो चलचित्र हिन्दी, तेलुगू, तमिल, कन्नड र मलयालम भाषामा प्रदर्शन भएको हो ।
राधे कृष्ण कुमारको निर्देशनमा बनेको यो फिल्ममा प्रेम र नियतीबीचको द्वन्द्वात्मक कथालाई प्रस्तुत गरिएको छ । फिल्ममा प्रभासले ज्योतिषीको भूमिका निभाएका छन् । सन् १९७० को दशकको कथा भन्ने फिल्ममा थोरै विज्ञानको कथा पनि रहेको छ ।
फिल्ममा प्रभास र पूजाबाहेक भाग्यश्री, क्रिशम राजु, सचिन खेदकर र प्रियादर्शीको पनि अभिनय रहेको छ । कोरोना महामारीले थलिएको फिल्म क्षेत्र भर्खर उठ्ने तरखर गरिरहेको छ । फिल्मले रिलिज हुनु अगाडि नै २०० करोड भन्दा बढी कमाइ गरिसकेको थियो । आन्ध्रा बक्स अफिसको रिपोर्ट अनुसार फिल्मको थिएट्रिकल राइट्स नै २१० करोड भारतीय रूपैयाँमा बेचेको थियो ।
प्रभास तेलुगू सिनेमाका सुपरस्टार हुन् । फिल्मले तेलुगू भाषामा सानदार ओपनिङ गरेको छ । तेलुगू भाषामा फिल्मले पहिलो दिन ३० करोडको आसपास कलेक्सन गरिसकेको छ । यस्तै हिन्दीमा ५ करोडको कलेक्सन गरिसकेको छ ।
