काठमाडौं । युक्रेनका राष्ट्रपतिले भोलोदिमिर जेलेन्स्कीले मस्कोलाई अविलम्ब अर्थपूर्ण शान्ति र सुरक्षावार्ता गर्न आह्वान गरेका छन् ।
उनले रुसी पक्षले गोलाबारी गरिरहेकाले अझैपनि मारिओपोलबाट गैरसैनिक नागरिकहरूलाई सुरक्षित रूपमा अन्यत्र जान बाटो दिन नसकिएको बताएको समेत बताउँदै रुससँग यस्तो आग्रह गरेका हुुन् ।
तर, युक्रेनमा आक्रमण गरेपछि रुसका लागि आफ्ना ‘गल्ती’ बाट हुने क्षति सीमित पार्ने यो मात्र एउटा अवसर भएको जेलेन्स्कीको भनाइ छ । राति गरेको भिडिओ सम्बोधनमा उनले भने, ‘रुसका लागि उसले गरेका गल्तीहरूबाट हुने क्षति घटाउने केवल यो मात्र एउटा अवसर हो ।’
‘यो भेट्ने बेला हो, यो कुरा गर्ने बेला हो, यो भूमिको अखण्डता र युक्रेनका लागि न्याय पुर्नस्थापित गर्ने बेला हो’ उनले भनेका छन्, ‘अन्यथा रुसको क्षति यस्तो हुन्छ कि त्यो पूर्ति गर्न धेरै पुस्ता लाग्छ ।’
बिबिसीले जनाएअनुसार यसैबीच रुसी राष्ट्रपति भ्लादिमिर पुटिनले मस्कोमा आयोजित एउटा सभामा बोल्दै आफ्नो सेनाको प्रशंसा गरेका छन् ।
