काठमाडौं । ओस्कार अवार्ड समारोहमा होस्टलाई थप्पड हानेका अभिनेता विल स्मिथले माफी मागेका छन् । सार्वजनिकरूपमा क्षमायाचना माग्दै आफूले सीमाभन्दा बाहिर गएर सो हर्कत गरेको उनको स्वीकारोक्ति छ ।
‘म तपाईं क्रिस रकसमक्ष सार्वजनिकरूपमा क्षमायाचना गर्न चाहन्छु । म सीमाभन्दा बाहिर गएको थिएँ र म गलत थिएँ’, एक विज्ञप्ति जारी गरी स्मिथले भनेका छन् ।
लस एञ्जेलसमा भएको ओस्कार अवार्ड समारोहमा आफ्नी श्रीमतीमाथि मजाक गरेको भन्दै स्मिथले कार्यक्रमका होस्ट क्रिस रकलाई स्टेजमै जोडदार थप्पड हानेका थिए । रकले कुनै प्रतिवाद गरेका थिएनन् । पछि सर्वोत्कृष्ट अभिनेताका अवार्ड जितेपछि स्मिथले रकको नाम नलिइकन घटनाका लागि दुस्ख व्यक्त गरेका थिए । सामाजिक सञ्जालमा तीव्र आलोचना भएपछि स्मिथले विज्ञप्ति जारी गरी माफी मागेका हुन् ।
इन्स्टाग्राममा लेखेको स्टाटसमा उनले भनेका छन्, ‘सबैप्रकारका हिंसाहरु विषाक्त र ध्वंसात्मक हुन्छन् । हिजो राति एकेडेमी अवार्डमा मेरो व्यवहार अस्वीकार्य र माफीयोग्य समेत थिएन । श्रीमतीको स्वास्थ्यसँग जोडिएको विषयमा मजाक गर्दा म आवेशमा आएको थिएँ ।’
स्मिथले एकेडेमी अवार्ड आयोजकसँग पनि क्षमा मागेका छन् । यता, स्मिथको कुटाइ खाएका कमेडीयन रक भने उक्त घटनालाई लिएर कतै उजुरी गर्ने मुडमा छैनन् । लस एन्जेलस प्रहरीले यस विषयमा उनीसँग कुराकानी गर्दा उजुरी नगर्ने बताए ।
लस एन्जेलस पुलिस डिपार्टमेन्टले विज्ञप्ति जारी गर्दै भनेको छ, ‘एकेडेमी अवार्ड कार्यक्रममा दुई व्यक्तिहरुबीच भएको घटनाबारे प्रहरी जानकार छ । उक्त घटनामा पीडित पक्षले प्रहरीमा रिपोर्ट दर्ता गर्न अस्वीकार गरेको छ । यदि पछि उजुरी दर्ता गर्न आएमा हामी यसलाई छानविनको विषय बनाउन सक्छौं ।’
कमेडीयनले भने एक विज्ञप्तिमार्फत घटनामा आफ्नै गल्ती रहेको बताएका छन् । उनले विल स्मिथ र उनकी पत्नीप्रति दुस्ख व्यक्त गरेका उनले भनेका छन्, ‘कमेडीयनका रूपमा प्रस्तुति दिँदै गर्दा कतिबेला आफ्नो सीमा तोडिएको हुन्छ भन्ने भेउ पाइँदैन । त्यो राति मैले आफ्नो सीमा तोडेँ र त्यसबापत महंगो मूल्य चुकाएँ । कमेडीको अर्थ मानिसहरूको पीडामाथि मजाक बनाउनु होइन । म मेरा मित्र विल स्मिथ र जाडा पिन्केट स्मिथसँग क्षमायाचना गर्न चाहन्छु ।’
