काठमाडौं । सशस्त्र प्रहरी महानिरीक्षक नियुक्त भएकै दिन सशस्त्र प्रहरी बलमा एआइजी बढुवा प्रक्रिया अघि बढेको छ । आइजिपी पुष्पराम केसीले एआइजी पदमा बढुवाको सूचना निकालेका छन् । बढुवाका लागि आकांक्षीहरुलाई तीन दिनभित्र शैक्षिक योग्यता लगायत प्रमाणपत्र पेश गर्न भनिएको छ ।
एआइजी बढुवामा राजु अर्याल, नारायणदत्त पौडेल तथा चन्द्रप्रकाश गौतम छन् । १ नम्बरका डिआइजी अर्याल नै एआइजी बढुवाका प्रमुख दाबेदारका रुपमा हेरिएको छ । हाल जो एआइजी हुन्छ, उही १९ बैशाखपछि महानिरीक्षक हुनेछ ।
उता सशस्त्र प्रहरी बलका प्रवक्ता पनि फेरिएका छन् । डिआइजी बिदुर खड्कालाई प्रवक्ताको जिम्मेवारी दिइएको छ । नयाँ आइजिपीले नभई यसअघि नै उनलाई सचिवालयमा खटाएर प्रवक्ताको जिम्मेवारी दिइएको स्रोत बताउँछ । यसअघि एसएसपी कमल तिउसिनाले प्रवक्ताको जिम्मेवारी सम्हाल्दै आएका थिए ।
