कालिकोट कालिकोट सदरमुकामको खाडाचक्र नगरपालिकामा नेकपा(एकीकृत समाजवादी)का बागी निर्वाचित भएका छन् । स्वतन्त्रबाट उम्मेदवारी दर्ता गराएका कमलबहादुर शाहीले एमालेका जिल्ला अध्यक्षलाई हराउँदै मेयर जितेका हुन् ।
सत्ता गठबन्धनबाट नगरप्रमुख नेपाली कांग्रेसको भागमा परेपछि शाहीले स्वतन्त्र उमेदवारी दिएका थिए । विद्रोह गरेका शाहीले गठबन्धनका उमेदवार र एमालेका कालिकोट अध्यक्ष जसिप्रसाद पाण्डेलाई नै पराजित गरेका हुन् । शाहीले दुई हजार ९१९ मत ल्याएका छन् । उनका निकटतम प्रतिस्पर्धी एमालेका पाण्डेले २६०९ मत ल्याएका थिए । उपप्रमुखमा माओवादी केन्द्रका गणेशबहादुर शाही निर्वाचित भएका छन् । खाडाचक्रमा ६ वडा माओवादीले जितेको छ । यस्तै, २÷२ वडा कांग्रेसले र एकीकृत समाजवादीले जित्दा एमाले एक वडामा सीमित भएको छ ।
