काठमाडौ । स्थानीय तहको निर्वाचनमा अन्तर्घात गरेको आरोपमा तीन नेता कार्यकर्तालाई एमालेले कारबाही गरेको छ । पोखरा महानगरपालिकाको निर्वाचनमा एकीकृत समाजवादीका उम्मेदवारलाई सघाएर जिताएको आरोपमा एमालेको कास्की कमिटीले बुधबार तीन जनालाई कारबाही गरेको हो ।
कारबाहीमा पर्नेहरुमा वडा नम्बर ३३ कमिटीका उपाध्यक्ष, महेश अर्याल, वडा नम्बर २१ का संगठित सदस्य मनोज पहारी र पोखरा ३३ का प्रशान्त आचार्य छन् । उनीहरुलाई संगठित सदस्यबाट निलम्बन गरिएको एमाले जिल्ला अध्यक्ष मनबहादुर गुरुङले बताए ।
पोखराको मेयरमा एमालेका उम्मेदवार कृष्ण थापालाई हराउँदै एकीकृत समाजवादीका धनराज आचार्य निर्वाचित भएका थिए । एमालेकै भोटले आचार्य निर्वाचित भएको विश्लेषण गरिएको छ । चुनावमा अन्तर्घात भएको पुष्टि हुने अडियो समेत चुनावपछि सार्वजनिक भएको थियो ।
