काठमाडौं । कार दुर्घटनामा परी गम्भीर घाइते भएकी हलिउड अभिनेत्री एनी हेचेको निधन भएको छ । क्यालिफोर्नियाको एक अस्पतालले उनलाई कानुनी रुपमा मृत घोषणा गरेको अन्तर्राष्ट्रिय समाचार एजेन्सीहरुले जनाएका छन् ।
समाचारमा उल्लेख गरिएअनुसार अंगदानको निधो नभएसम्म उनको शवलाई भेन्टिलेटरमै राखिने भएको छ । आगामी मंगलबारसम्म भेन्टिलेटरबाट निकालेर एनीको अंगदान दिने परिवारको तयारी छ ।
‘आज हामीले एक उज्ज्वल प्रकाश, एक दयालु र सबैभन्दा आनन्दित आमा, मायालु आमा र एक बफादार साथीलाई गुमायौं,’ हेचेको मस्तिष्क मृत्यु भइसकेको भन्दै परिवार र साथीहरुले जारी गरेको विज्ञप्तिमा भनिएको छ । कार दुर्घटनमा गम्भीर घाइते भएकी अभिनेत्री एनीलाई ६ दिनअघि अस्पतालमा भर्ना गरिएको थियो ।
लस एन्जलसस्थित आफ्नो घर नजिक भएको कार दुर्घटनामा एनी गम्भीर घाइते भएकी थिइन् । सन् १९९७ मा रिलिज भएको फिल्म ‘डोनी ब्रास्को’, ‘आइ नो ह्वाट यू डिड लास्ट समर’का उनका चर्चित फिल्म हुन् ।
