पहिरोले मध्यपहाडी राजमार्ग अवरुद्ध

काठमाडौं । पहिरो खस्दा मध्यपहाडी राजमार्गको खुर्कोट-घुर्मी सडकखण्ड अवरुद्ध भएको छ ।

सिन्धुलीको गोलञ्जोर गाँउपालिका–१ कुडुलेमा सुख्खा पहिरो खस्दा राजमार्ग अवरुद्ध भएको हो । बिहान ४ बजेदेखि निरन्तर पहिरो खसेपछि राजमार्ग अवरुद्ध भएको प्रहरी उपरीक्षक बिमलराज कँडेलले जानकारी दिए ।

उनका अनुसार पूर्वी पहाडी जिल्लाबाट मध्यपहाडी राजमार्ग हुँदै गुड्ने सवारीसाधन बाटोमै थन्किएका छन् । इलाका प्रहरी कार्यालय खुर्कोटको टोलीले अहिले पहिरो पन्छाउने काम गरिरहेको छ ।

स्थानीयवासीको सहकार्यमा पहिरो पन्छाउने काम भइरहेको कँडेलले बताए । ‘बिहानैदेखि पहिरो खसिरहेको छ । झर्ने क्रम रोकिएको छैन,’ गोलञ्जोरका उपाध्यक्ष ज्वालाप्रसाद न्यौपानेले भने ।

बाटोमा सयौं यात्रु अलपत्र परेको उनले बताए ।