काठमाडौं । सस्तोमा जग्गा बिक्री गर्ने भन्दै एक करोड रुपैयाँ ठगी गर्ने ६ जना पक्राउ परेका छन् । हङकङ बस्ने गीता बुढाथोकीलाई काठमाडौं भीमढुंगाको जग्गा सस्तोमा बिक्री गर्ने भन्दै ठगी गर्नेलाई केन्द्रीय अनुसन्धान ब्युरोले पक्राउ गरी आइतबार अदालतमा मुद्दा दायर भएको छ ।
प्रेम खत्री, गुञ्जसिंह थापा, शिव भण्डारी, हरि श्रेष्ठ, कुमार मानन्धर र रामराज भण्डारीविरुद्ध लिखत कसुर तथा ठगी मुद्दा दायर भएको हो । १९ रोपनी १३ आना जग्गामध्ये मोहियानी हक छुटाएर आनाको पाँच लाख रुपैयाँका दरले दिने भन्दै उनीहरूले गत ८ साउनमा एक करोड रुपैयाँ बैना लिएका थिए । नागार्जुन नगरपालिका वडा नम्बर ८ मा लिखत प्रमाणीकरण दस्तुरसमेत बुझाई वडाध्यक्ष शुक्रबहादुर तामाङको हस्ताक्षर भएको पत्र देखाएका थिए । पछि बुझ्दा सो पत्र नै उनीहरूले किर्ते गरेको खुलेको हो । उनीहरूले सोही जग्गा बिक्री गर्ने भन्दै रामकुमार थपलिया र गोविन्द नगरकोटीलाई समेत १५ लाख बैना लिई ठगी गरेको सिआइबीका एसपी कमल थापाले बताए ।
