काठमाडौं । नेकपा एमालेबाट दाङ–३ बाट प्रतिनिधिसभा सदस्यका उम्मेदवार कोमल वलीले भारतीय प्रधानमन्त्री नरेन्द्र मोदीको नारा नेपालीमा अनुवाद गरेर भोट मागेका छन् ।
उम्मेदवार ओलीले असोज २८ गते दुई प्रदेशसभा सदस्यका उम्मेदवारलाई दायाँ बायाँ राखेर एक पोस्टर सार्वजनिक गरेका थिए । उक्त पोस्टरमा ‘अति नै भयो महंगीको मार, चाहिने नै भयो एमालेको सरकार’ लेखिएको छ ।
वलीको उक्त पोस्टरमा लेखिएको नारा सन् २०१४ को निर्वाचनमा हाल भारतीय प्रधानमन्त्री नरेन्द्र मोदीले प्रयोग गरेको नारासँग हुबहु मिल्छ ।
मोदीले ०१४ मा सार्वजनिक गरेको पोस्टरमा ‘बहुत हुई देश मे महँगाइ की मार, अबकी बार मोदी सरकार’ लेखिएको छ ।
मोदी र वलीको नारा हुबहु मिल्छ । वलीले ‘मोदी सरकार’को ठाउँमा ‘एमालेको सरकार’ मात्र लेखेर पोस्टर बनाएका हुन् ।
आजभोली भने वलीले उक्त पोस्टर भोट माग्न प्रयोग गरेको देखिन्न । वलीले मोदीको नारासँग मिलेको आरोप लागेपछि उक्त पोस्टर प्रयोग गर्न छोडेको अनलाइन न्यूज पोर्टल अनलाइनखबरलाई प्रतिकृया दिएका छन् ।
अनलाइनखबरसँग वलीले भनेका छन्–
‘टिमले बनाइरहेको छ । भारतको राम्रो लागेर प्रभावित भएका होला, अब म यो चेन्ज गर्न लगाउँछु ।’
एमालेकै महासचिव शंकर पोखरेललाई पनि नेपाली कांग्रेसले २०७४ को प्रतिनिधिसभा तथा प्रदेशसभा निर्वाचनका लागि जारी गरेको घोषणापत्रको कभर स्केच चोरी गरेको आरोप लागेको छ ।
