एजेन्सी । फ्रान्सका स्टार पउल पोग्बाले फिफा विश्वकप गुमाउने भएका छन् ।
चोटका कारण उनले कतारमा हुने विश्वकप खेल्न नसक्ने भएका हुन् । विश्वकप अघि पोग्बा निको हुने अपेक्षा गरिएको थियो ।
तर, घुँडाको शल्यक्रियाबाट निको हुन अझै समय चाहिने भएकाले उनी कतार नजाने भएका हुन् । पोग्बाका एजेन्ट राफायल पिमेन्टाले पोग्बा फ्रेन्च टोली बाहिर रहने स्पष्ट पारेका छन् । पोग्बा आफूलाई चाँडो मैदान फर्काउन चाहन्छन् ।
तर, उनलाई धैर्यता राख्न आवश्यक रहेको राफायलले बताए । पोग्बाले अन्तिम टिममा स्थान बनाउने विश्वास गरिएको थियो । तर, पछिल्लो चोटले उनी छनोट दौडबाट बाहिरिएका छन् ।
पोग्बाले विश्वकप गुमाउने भएपछि फ्रान्सलाई ठूलो झड्का लागेको छ । टोलीका अर्का सदस्य एनगोलो कान्टे यसअघि नै विश्वकप बाहिर रहने पक्का भइसकेको छ ।
फ्रान्सले पछिल्लो विश्वकपको उपाधि उचाल्दा पोग्बा र कान्टे टोलीका महत्वपूर्ण हिस्सा थिए ।
