काठमाडौं । लागूऔषधको मुद्दाको अनुसन्धानमा चलखेल गरी अभियुक्तलाई छुटाउन सहयोग गर्ने नेपाल प्रहरुीका इन्सपेक्टर कारबाहीमा परेका छन् । जिल्ला प्रहरी कार्यालय सुर्खेतका इन्सपेक्टर लालबहादुर सुनारमाथि विभागीय कारबाही भएको छ ।
ब्राउन सुगरसहित पक्राउ परेका अभियुक्तसँग आर्थिक लाभ लिइ मुद्दालाई कमजोर बनाएको छानबिनमा खुलेपछि उनी कारबाहीमा परेका हुन् । । प्रहरीकै कमजोरीले लागुऔषध मुद्दामा अभियुक्तहरु धरौटीमा छुटेका थिए । छानबिनको क्रममा प्रहरी अनुसन्धानका आधारभुत सिद्धान्त समेत पालना गरेका थिएनन् । बरामदी रोहबरमा कम्तीमा एक जना जनप्रतिनिधि वा सरकारी कर्मचारीलाई राख्नुपर्नेमा उनले कसैलाई राखेका थिएनन् । साथै बरामदी कपडाको समेत सनाखत गराएका थिएनन् । अभियुक्तलाई फाइदा हुने गरी अनुसन्धान प्रतिवेदन तयार गरेका थिए । सोही आधारमा अभियुक्तलाई अदालतले छाडेको थियो । अभियुक्तबाटै लागुऔषध बरामद भएको प्रष्ट प्रमाण नै नराखी मुद्दा दायर गरिएको थियो, जसकारण अदालतले धरौटीमा छाडेको थियो । अनुसन्धानमा लापरबाही गरेकाले इन्सपेक्टर सुनुवारलाई नसिहत दिइएको केन्द्रीय प्रहरी प्रवक्ता डिआइजी टेक प्रसाद राईले बताए ।
सो घटनामा सुर्खेतका एसपी पदबहादुर बिष्टमाथि समेत कारबाही भएन । स्रोतका अनुसार यो घटनामा एसपी बिष्टको पनि शंकास्पद भूमिका देखिएको थियो । एसपी र इन्सपेक्टरकै मिलेमतोमा अभियुक्तलाई जोगाउन खोजेको सूचना प्रहरी प्रधान कार्यालयले पाएको थियो । तर, एसपीमाथि विस्तृत छानबिन नै नगरिएको स्रोत बताउँछ । कांग्रेस नेताको दबाबमा उनीमाथि कारबाही नभएको हो । एसपीको मिलेमतोबिना यस्तो चलखेल सम्भव नहुने एक प्रहरी अधिकारी बताउँछन् ।
