काठमाडौं । कतारमा हुन गइरहेको फिफा विश्वकपको गीत ‘लाइट द स्काई’ मा बलिउड अभिनेत्री नोरा फतेहीले आफ्नो प्रस्तुति दिने भएकी छन् ।
यही मंसिर ४ गते कतारमा विश्वकप फुटबल–२०२२ सुरु हुँदैछ । जहाँ नोराले आफ्नो प्रस्तुति दिन लागेको भारतीय सञ्चारमाध्यमले उल्लेख गरेका छन् ।
फिफाले विश्वकपका लागि आफ्नो गीत ‘लाइट द स्काई’ सार्वजनिक गरेको छ । यो गीतमा नोरा फतेहीले पनि नृत्य गर्ने भएकी छन् । नोराले फिफाको उद्घाटन र समापन समारोहमा आफ्नो प्रस्तुति दिने जनाइएको छ । समापन समारोहमा उनले एक लोकप्रिय हिन्दी गीतमा नाच्ने भारतीय मिडियाले उल्लेख गरेका छन् ।
विश्वकपको अघिल्लो संस्करणहरुमा हलिउड गायिका जेनिफर लोपेज र सकिराजस्ता विश्वप्रसिद्ध सेलिव्रिटीले आफ्नो उत्कृष्ट प्रस्तुति दिइसकेका छन् । फुटबलको सबैभन्दा ठूलो प्रतियोगिता फिफा विश्वकप एसियाली राष्ट्र कतारले आयोजना गरेको हो ।
