काठमाडौं । नेकपा माओवादी केन्द्रकी उपमहासचिव पम्फा भुसाल प्रतिनिधिसभाको निर्वाचन जित्नेमा आफू ढुक्क छिन् ।
उर्जा, जलश्रोत तथा सिँचाईमन्त्री समेत रहेकी भुसालले आइतबार ललितपुर निर्वाचन क्षेत्र नम्बर ३ को चुनावी घरदैलो कार्यक्रममा बोल्दै आफू यसअघि पनि दुई पटक यस क्षेत्रबाट विजयी भइसकेकाले यसपटक पनि विजयी हुनेमा विश्वस्त रहेको बताइन् ।
ललितपुर निर्वाचन क्षेत्र नम्बर ३ का जनताको लागि राम्रा कामहरु गरेकाले पराजय भोग्नुपर्ने अवस्था नआउने उनको दाबी छ । मन्त्री भुसालले घरदैलो कार्यक्रममा आम मतदाताहरु सत्ता गठबन्धन र विशेष गरी आफूसँग खुशी र सन्तुष्ट रहेको बताइन् ।
आसन्न निर्वाचनलाई लक्षित गरी विभिन्न क्षेत्रका प्रतिनिधि र प्रदेश सभा उम्मेदवारहरुले आफ्नो प्रचारप्रसारका लागि यति बेला घरदैलो कार्यक्रमलाई तीब्र बनाएका छन् । आम मतदाताको घरमा पुगेर उम्मेदवारहरु आफूलाई भोट माग्न लागिपरेका छन् ।
