काठमाडौं, २१ भदौं । नेपाल–चीनबीच यो आउने सोमबार दुवै देशका परराष्ट्रमन्त्रीको नेतृत्वमा वार्ता हुँदैछ । राजधानीमा हुने प्रतिनिधिमण्डलस्तरीय उक्त वार्ता आर्थिक र विकास साझेदारीमा केन्द्रित हुने बताइएको छ ।
चिनियाँ विदेशमन्त्री वाङ यीको आइतबारदेखि हुने नेपालको औपचारिक भ्रमण र द्विदेशीय प्रतिनिधिमण्डलस्तरीय वार्ताबारे संक्षिप्त कुराकानीमा परराष्ट्रमन्त्री प्रदीपकुमार ज्ञवालीले नेपाल–चीन सम्बन्धका समग्र पक्षका साथै पारस्परिक हित र चासोका सबै विषयमा छलफल हुने बताए ।
उनले दुई देशबीच विगतमा भएका सन्धि सम्झौता तथा नेपालमा सञ्चालित विकास–निर्माणका परियोजनाको समीक्षाका साथै तिनको द्रुत कार्यान्वयनमा जोड दिइने बताए ।
चीन र नेपालबीच हिमालय सीमापार बहुआयामिक सम्पर्क सञ्जाल निर्माण गर्न भएका समझदारी, रेलमार्ग निर्माण तथा परस्परमा सम्पर्क विस्तार र दुई देशबीच भएको यातायात तथा पारवहन सम्झौतालगायत विषयमा केन्द्रित रहेर वार्ता हुने मन्त्री ज्ञवालीले बताए । चार वर्षको अन्तरालमा चिनियाँ विदेशमन्त्रीबाट यो भ्रमण हुन लागेको छ ।
नेपालको विकासको भरपर्दो साझेदार चीनले हासिल गरेको भौतिक एवं आर्थिक विकासबाट नेपाल कसरी लाभान्वित हुनसक्छ भन्नेमा नेपालको ध्यान केन्द्रित रहेको उल्लेख गर्दै उहाँले वार्तामा द्विपक्षीय हित, क्षेत्रीय र अन्तर्रा्ष्ट्रिय चासोका विविध विषयमा पनि विचारविमर्श हुने बताए ।
चीनको राज्य परिषद्का सदस्यसमेत रहेका विदेशमन्त्री वाङको यो भ्रमणलाई चिनियाँ राष्ट्रपति सी चीनफिङको भावी नेपाल भ्रमणको पूर्वतयारीका रुपमा लिन सकिन्छ कि भन्ने जिज्ञासामा उनले नेपाल भ्रमण गर्न चिनियाँ राष्ट्रपतिका निम्ति उपयुक्त समय भएको बताए । उनले भने, ‘उच्चस्तरीय नेतृत्वको आगमन उत्साहको विषय हो तर भ्रमणको मिति निर्धारण भएको छैन ।’
नेपालका घनिष्ठ मित्र चीन भएकाले चिनियाँ राष्ट्रपतिले उपयुक्त समयमा भ्रमण गर्नेमा आफू आशावादी रहेको परराष्ट्रमन्त्रीको भनाइ छ । राष्ट्रपति विद्यादेवी भण्डारीले यसै वर्ष चीनको राजकीय भ्रमणका क्रममा आफ्ना चिनियाँ समकक्षीलाई नेपाल भ्रमणका निम्ति गरेकी थिइन् ।
