चौतारा । भूकम्पबाट क्षति भएका सिन्धुपाल्चोक जिल्लाका पाँच सरकारी भवनको पुनःनिर्माणपछि उद्घाटन गरिएको छ । राष्ट्रिय पुनःनिर्माण प्राधिकरणका प्रमुख कार्यकारी अधिकारी सुशील ज्ञवाली, संघीय संसदका सांसदद्वय अग्नि सापकोटा र शेरबहादुर तामाङले पुनःनिर्माण सम्पन्न भएका भवनहरुको उद्घाटन गर्नु भएको हो ।
उद्घाटन गरिएका भवनहरुमा जिल्ला वन कार्यालय एनेक्स भवन, कोष तथा लेखा नियन्त्रकको कार्यालय, प्रमुख जिल्ला अधिकारीको आवास भवन, मालपोत कार्यालय एनेक्स भवन र जिल्ला आकस्मिक सहायता भवन छन् ।
यी भवनको नेपाल सरकार र एशियाली विकास बैंकको आर्थिक सहयोगमा भवनहरु पुनःनिर्माण गरिएको हो । पाँचवटा भवनको पुनःनिर्माण लागत १५ करोड रुपैयाँ छ । भदौ २७ गते शुक्रबार चौतारामा आयोजित उद्घाटन समारोहमा राष्ट्रिय पुनःनिर्माण प्राधिकरणका प्रमुख कार्यकारी अधिकृत सुशील ज्ञवालीले पुनःनिर्माण गरिएका नयाँ भवनहरुमा सरकारी सेवा प्रवाह अझ प्रभावकारी हुने र जनतालाई थप सुविधा पुग्ने विश्वास व्यक्त गर्नुभयो । उहाँले भूकम्पबाट सबै भन्दा बढी मानवीय क्षति भएको सिन्धुपाल्चकोमा निजी आवास, विद्यालय, सरकारी भवन लगायतको पुनःनिर्माणले विपद्लाई अवसरका रुपमा परिणत गरेको बताउनुभयो ।
सांसद अग्नि सापकोटाले भौतिक संरचनाहरुको पुनःनिर्माणले सिन्धुपाल्चोकको मुहार बदलेको बताउनुभयो । उहाँले यसरी पुनःनिर्माण होला भनेर विपद् लगत्तै आफूले नसोचेको उल्लेख गर्दै पुनःनिर्माणमा संलग्न सबैलाई धन्यवाद दिनुभयो । सांसद सापकोटाले भूकम्प स्मृति पार्कको पुनःनिर्माण प्रकृया अघि बढेको भन्दै यसलाई नमूनाका रुपमा अघि बढाउन सरकारलाई आग्रह गर्नुभयो ।
अर्का सांसद शेरबहादुर तामाङले जिल्लामा पुनःनिर्माण राम्रोसँग अघि बढेको बताउँदै मानवीय क्षति भए पनि भूकम्प अभिसाप नभई वरदान सावित भएको बताउनुभयो । उहाँले पुनःनिर्माणपछि सिन्धुपाल्चोक विकासको नमूना जिल्लामा पर्ने दाबी गर्दै राष्ट्रिय पुनःनिर्माण प्राधिकरण, जनता, जनप्रतिनिधि लगायतलाई धन्यवाद दिनुभयो ।
प्रदेश नं ३ का सभासद् सरेश नेपालले निजी आवास, सरकारी भवन लगायतका संरचनाहरु बनेको खुशी व्यक्त गर्नुभयो । उहाँले बाँकी रहेका सम्पदा र जनताका गुनासाको सुनुवाई गर्न सुझाव दिनुभयो ।
राष्ट्रिय पुनःनिर्माण प्राधिकरण केन्द्रीय आयोजना कार्यान्वयन इकाई (भवन) का आयोजना निर्देशक नवराज प्याकुरेलले भूकम्पबाट क्षति भएका भौतिक संरचनाहरुको पुनःनिर्माणलाई समयमा सम्पन्न गर्ने गरी काम गरेको बताउँदै पुनःनिर्माणमा सहयोग गर्ने निर्माण व्यवसायी लगायत सबैलाई धन्यवाद दिनुभयो ।
जिल्ला आयोजना कार्यान्वयन एकाइका प्रमुख सन्तोष निरौलाले नेपाल सरकार र एसियाली विकास बैकमार्फत १७ वटा भवनमध्ये ६ वटाको पुनःनिर्माण सम्पन्न भएको र १० वटा पुनःनिर्माणको प्रकृयामा रहेको जानकारी दिनुभयो । उहाँले भारतीय एक्जिम बैंकबाट प्राप्त हुने रकमबाट बन्ने सरकारी भवनहरुको पुनःनिर्माण प्रकृया पनि अघि बढेको जानकारी दिनुभयो ।
