काठमाडौं । यति एयरलाइन्सको विमान दुर्घटनामा लोकगायिका निरा छन्त्याल पनि परेकी छन् । शनिबार मात्रै काठमाडौंका एक कार्यक्रममा सहभागी भएर आइतबार उनी पोखरा उडेकी थिइन् ।
तर, दुभाग्य, उनी सवार यति एयरलाइन्सको विमान दुर्घटनाग्रस्त भयो । उनी पोखरा जानुअघि शनिबार साँझ आफ्नो फेसबुक एकाउन्टमा आफू ‘पोखरा जाँदै गरेको जानकारी गराएकी थिइन् । तर, उनले लेखेकी थिइन्, ‘छन्त्याल भवन काठमाडौंको माघी सकियो, अब भोलि पोखरामा रमाइलो गर्नुपर्छ ।’ तर, उनी गन्तव्यमा पुग्न पाइनन् ।
उनीसँगै विमानमा रहेका ६८ जना यात्रुलाई चारजना चालक दलका सदस्यले उडाइरहेका थिए । विमानस्थलमा अवतरण गर्नुभन्दा केही सेकेण्ड अगाडि विमान पोखराको घारेपाटनस्थित सेती नदीको खोचमा खसेपछि निराको पोखरामा रमाउने चाहना पूरा हुन पाएन ।
उनको अवस्थाबारे अज्ञातै रहेपनि यति एयरलाइन्सले उपलब्ध गराएकाे दुर्घटनाग्रस्त विमानमा सवार यात्रुको सूचीमा उनको पनि नाम उल्लेख छ । तर, पुष्टि हुन सकेको छैन ।
