काठमाडौं । सोमबार यातायात मजदुरको आन्दोलनमा नयाँ बसपार्कस्थित ल्होत्से मलमा लुटपाट गर्नेलाई कारबाही गर्ने गृहमन्त्रालयले प्रहरीलाई निर्देशन दिएको छ ।
सोमबार आन्दोलनकारीको एक समूहले ल्होत्से मलमा सञ्चालित पसलबाट मोवाइल लुटपाट गरेका थिए । उनीहरुले लुटपाट गरेको भिडियोहरु समेत अहिले सामाजिक सञ्जालमा भाइरल बनेको छ ।
आज (मंगलबार) गृह मन्त्रालयका सचिव विनोदप्रकाश सिंहले प्रहरी महानिरीक्षक धिरजप्रताप सिंहलाई टेलिफोन गरी उक्त घटनामा संलग्नको पहिचान गरेर कारबाही गर्न निर्देशन दिएका हुन् ।
सोमबार मलबाट आठ करोडभन्दा बढीको सामन लुटिएको व्यावसाहीले जनाएका छन् । सोमबार नयाँ बसपार्कको ब्यवस्थापन लिएको ल्होत्से समूहले यातायात व्यवसायीमाथि हातपात गरेको भन्दै उक्त समूहको मलमा आन्दोलनकारीले तोडफोड गरेका थिए ।
त्यसैबेला आन्दोलनकारीले करोडौंको सामान चोरी भएको ल्होत्से मलका व्यवसायीहरुको भनाइ छ । सीसीटिभी फुटेजको आधारमा लुटपाटमा संलग्नहरुको खोजी भइरहेको प्रहरीले बताएको छ ।
