काठमाडौं । नेपाली साहित्य समाज, क्यालगरी, क्यानडाद्वारा प्रकाशित दुई कथासङ्ग्रह ‘नेपालदेखि क्यानडासम्म’ र ‘अझै जिउँदै छन् मुर्कट्टहरू’ एक समारोहबीच क्यानडाको क्यालगरीमा सार्वजनिक गरिएका छन् ।
‘नेपालदेखि क्यानडासम्म’ रुद्र दाहालको संयोजनमा सम्पादित लघुकथाहरूको सँगालो हो भने ‘अझै जिउँदै छन् मुर्कट्टाहरू’ नेपाली साहित्य समाज क्यालगरीका अध्यक्ष केशवमोहन अधिकारीद्वारा लिखित कथा सङ्ग्रह हो ।
उक्त कार्यक्रममा पुस्तक सम्पादन मण्डलका संयोजक रुद्र दाहालले क्यानडामा रहेर नेपाली साहित्यको संवृद्धिमा लाग्दाका अनेक अप्ठ्यारा सुनाउँदै आफूहरू यस क्षेत्रमा निरन्तर लागिरहने र विदेशी भूमिबाट नेपाली साहित्यको सेवा गरिरहने बताए । त्यसैगरी समाजका अध्यक्ष तथा ‘अझै जिउँदै छन् मुर्कट्टाहरू’ कथा सङ्ग्रहका लेखक अधिकारीले आफू स्वदेश र विदेश जहाँ रहे पनि नेपालीपन झल्कने कथा रचना गरेको बताए ।
उक्त कार्यक्रममा समाजका पूर्वअध्यक्ष दीपक ढकालले कविता सुनाएका थिए भने समाजका निर्देशक राजेन्द्र गौतमले पुस्तकहरूको समीक्षा गरेका थिए । सो कार्यक्रममा नेपलिज कम्युनिटी सोसाइटी अफ क्यालगरीका वर्तमान तथा पूर्व पदाधिकारीहरू, एनआरएनए क्यानडाका प्रतिनिधिहरू तथा क्यालगरीमा रहेका नेपालीहरूको सहभागिता रहेको थियो ।
नेपाली साहित्य समाज, क्यालगरी विदेशमा रहेर पनि नेपाली भाषा, कला, संस्कृति र साहित्यलाई जीवन्त राख्नुपर्छ भन्ने सोचका साथ सन् २०१२ मा स्थापना भएको साहित्यिक संस्था हो । स्थापना कालदेखि नै यो संस्थाले पुस्तक प्रकाशन, साहित्यिक गतिविधि सञ्चालन तथा रचनावाचनजस्ता कार्यहरू गर्दै आएको छ ।
प्रस्तुत कार्यक्रम समाजका अध्यक्ष केशवमोहन अधिकारीको अध्यक्षता तथा सचिव भीमलाल आचार्यको सञ्चालनमा सम्पन्न भएको थियो ।
