काठमाडौं । सोमबार बढुवा भई बुधबार फुली लगाएका नेपाल प्रहरीका पाँच प्रहरी अतिरिक्त महानिरीक्षक (एआईजी) मा बढुवा भएका ५ जना प्रहरी अधिकारीले प्रधानमन्त्री पुष्पकमल दाहाल प्रचण्डलाई भेटेका छन् । सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा दाहालले बढुवा भएका एआईजीहरुलाई बधाई दिएका छन् ।
प्रहरी महानिरीक्षक (आईजीपी) धिरजप्रताप सिंहसहित सिंहदरबार पुगेका ५ एआईजीमध्येबाटै दुई दिनपछि आईजीपी नियुक्ति हुँदैछ । भेटमा प्रधानमन्त्री प्रचण्डले बढुवा भएका सबै अधिकृत उत्कृष्ट रहेको र उनीहरुमध्येबाटै आइजिपी छानिने बताएका छन् ।
महानिरीक्षक सिंहले पनि पदोन्नति भएका प्रहरी अधिकृतहरुको व्यक्तिगत, पारिवारिक र व्यावसायिक जीवनको सफलताको शुभकामना दिँदै पदोन्नति भएका मध्यबाटै संगठन प्रमुख हुने भएकोले आगामी दिन संगठन प्रमुखको रुपमा प्राप्त हुने जिम्मेवारी बहन गर्नका लागि तयार रहन निर्देशन दिएका थिए ।
शुक्रबारदेखि आइजिपी सिंहले अवकाश पाउने भएकाले बिहीबार वा शुक्रबार महानिरीक्षकमा नियुक्ति हुँदैछ ।
