पछिल्लो समय ढाका पहिरन निकै लोकप्रिय छ । एक दशकअघिसम्म ढाकालाई आदिवासी जनजातीका पहिरनसँग समेत जोडेर हेरिन्थ्यो । तर, हिजोआज ढाकाकाे पहिरन सेलिब्रेटीदेखि व्यापारीसम्मको रोजाइ बनेको छ । फेसन बजारमा ढाका पहिरनको ट्रेण्ड बढ्नुमा ‘तेह्रथुमे ढाका बुटिक’को ठूलो देन छ । तेह्रथुमे ढाका बुटिकले देश-विदेशसम्म ढाकाको पहिरन बजारीकरण तथा प्रवद्र्धन गर्दै आएको छ । ललितपुरको तिखेदेवलमा रहेको ‘तेह्रथुमे ढाका बुटिक’की सञ्चालक हुन् फेसन डिजाइनर निरु आङबुङ लिम्बू ।
तेह्रथुम आङबुङकी निरुले २०७१ मा सानो लगानीमा ललितपुरको मिलन चोकमा ‘तेह्रथुमे ढाका कलेक्शन’ नाममा ढाका व्यापार सुरु गरेकी थिइन् । तर, अहिले उक्त ढाका बुटिक देश विदेशमा चर्चित छ । निरु भन्छिन्, ‘सीएलको पढाइ सकेर गाउँ फर्कनुभन्दा यही केही गर्छु भनेर ढाका कलेक्शन सुरु गरेकी हुँ । तर, ढाका पहिरन फेसन बन्छ भन्ने सोचेकी थिइनँ ।’ तीन लाखमा सुरु भएको ‘तेह्रथुमे ढाका बुटिक’को प्रोपर्टी अहिले करोडमाथि पुगेको छ । तेह्रथुमे ढाका बुटिककी सञ्चालक तथा फेसन डिजाइनर निरु आङबुङसँग एमपी सुब्बाको जम्काभेट :
अहिले ढाका पहिरनको व्यापार कस्तो छ ?
सन्तोषजनक छ । लकडाउनको बेलाचाहिँ विरक्त लाग्दो थियो । करिब दुई वर्षे लकडाउन हुँदा व्यापारमा ह्रास आएको थियो । तर, अहिले व्यापार ठिकै छ । समग्रमा भन्नुपर्दा अहिले लकडाउनको घाटा पूर्ति भइरहेको छ ।
हिजोआज अधिकांश कार्यक्रमहरुमा ढाका फेसन झल्किन्छ । जाे तेह्रुथुमे ढाका बुटिककै योदागन त होला नि ?
हो, अहिले त ढाका पहिरनको ट्रेण्ड नै चलेको छ । यसमा तेह्रथुमे ढाका बुटिकको पनि योगदान छ । त्यसो त अहिले थुप्रै तेह्रथुमे ढाका नाममा पसल र बुटिकहरु खोलिएका छन् । तर, मैले ढाका कलेक्शन सञ्चालनमा ल्याउँदा एउटा पनि यहाँ ढाका पसल थिएन । तेह्रथुमे ढाका पहिरन स्थापित गर्नुमा मैले धेरै संघर्ष र मिहिनेत गरेकी छु ।
ढाकाको पहिरन व्यापक होला भनेर सोच्नुभएको थियो ?
देश-विदेशमा तेह्रथु्मे ढाकाको फेसन फैलिन्छ भनेर त सोचेकी थिइनँ । सीएलको पढाइसकेपछि घर फर्किनुभन्दा यही ठाउँमा केही गरौँ भन्ने सोचले ढाका कपडा र पहिरनको सुरुवात गरेकी हुँ ।
ढाका पहिरनको ट्रेण्ड बढ्दै जानुको कारण के हो ?
मुख्य कुरा प्रमोशन नै हो । सुरुवातमा ‘तेह्रथुमे ढाका कलेक्शन’ नाम राखेकी थिएँ । कलेक्शन गरेर काम गर्ने भएकाले कलेक्शन जोडेकी हुँ । विस्तारै म्युजिक भिडियो र फिल्म क्षेत्रका सेलिब्रेटीले तेह्रथुमे ढाकाको पहिरन लगाउन थाले । कतिपय सेलिब्रेटीलाई प्रायोजन पनि गर्थे । हुँदाहुँदै पूर्व मेचीदेखि पश्चिम महाकालीसम्मका कलाकारले तेह्रथुमे ढाकाकाे पहिरन लगाउन थालेका छन् । अहिले विभिन्न देशबाट पनि नेपालीले ढाका पहिरन अर्डर गर्दै आएका छन् । यो सबै प्रमोशनकै कारण हो ।
सेलिब्रेटीकै कारण तेह्रथुमे ढाका व्यापक भएको हो ?
प्रमोशनकाे सुरुवात सेलिब्रटीबाटै भयो । त्यसपछि मैले ढाका पहिरनको प्रमोशनका लागि विभिन्न फेसन शो तथा इभेन्टहरुमा स्पोन्सर गरेँ । अहिले पनि गर्दै आएकी छु । ‘मिस इण्डिजिनियस हेरिटेज नेपाल(२०१७’मा मैले पहिरन स्पोन्सर गरेकी थिएँ । ‘मिस लिम्बू’को सिजन(४ देखि अहिलेसम्म पनि पहिरन स्पोन्सर गर्दै आएकी छु । तेह्रथुमे ढाकाको लोकप्रियता बढ्दै जानुको कारण यो पनि हो ।
तेह्रथुमे ढाका बुटिकको पहिरन विदेशमा कहाँ कहाँ जान्छ ?
जहाँ नेपाली पुगेका छन् । त्यहाँ तेह्रथुमे ढाका पुगेको छ । विशेषगरी हङकङ, युके, सिंगापुर, अष्ट्रेलिया, क्यानडा र जापानतिर बढी जान्छ । अन्य देशहरुबाट पनि नेपालीले अर्डर गरिरहेको हुन्छ ।
विदेश व्यापारको प्वाइट चिनजान कि अनलाइन ?
बढी चिनजानबाटै अर्डर आउँछ । एउटा देशमा एकजना चिनेपछि उसले अर्डर गर्छ । त्यसपछि त्यहीँबाट चिनजान थपिँदै सञ्जाल फैलिँदै जान्छ । र, अनलाइनबाट पनि अर्डर आउने गरेको छ ।
पछिल्लो समय जताततै ढाका बुटिक खुलेका छन् । यसबाट तपाइँलाई घाटा छ कि फाइदा ?
एक किसिमले घाटा र अर्को तरिकाले सोच्दा फाइदा छ । अरुहरुले तेह्रथुमे ढाका भनेर यही कलेक्शन गर्छन् । र, सस्तोमा बेच्छन् । सस्तोमा लिनेहरुले तेह्रथुमे ढाका बुटिकमा महँगो छ भन्छन् । तर, म चाहिँ तेह्रथुमै तानमा बुनेको ढाकामात्र बेच्छु । त्यसो गर्दा थोरै महँगो पर्न जान्छ । त्यसैले क्वालिटी हेर्नेहरुका लागि मेरो बुटिक महँगो छैन । अर्को कुरा, अरुले जताको ढाका बेचेपनि तेह्रथुमे ढाकाकै प्रचार भइरहेको छ ।
सुरुवाती लगानी कति र अहिले प्रोपर्टी कति पुग्यो ?
एकदमै कम लगानीमा सुरु गरेकी थिएँ । तानतुन गरेर करिब तीन लाख रुपैयाँमा यो बुटिक सुरु गरेकी हुँ । अहिले एक करोडभन्दा बढी प्रोपर्टी पुग्यो ।
तपाइँलाई तेह्रथुमे ढाकाको व्यापार फाप्यो होइन त ?
मिहिनेत पनि धेरै गरेकी छु । तेह्रथुमे ढाकाको प्रमोशनका लागि जीन्दगी नै समर्पण गरेकी छु । मिहिनेत र दुःख गरेअनुसार फल पाइरहेकी छु । यसमा खुसी छु ।
हिजोआज पनि लुगा भाडामा दिनुहुन्छ ?
हिजोआजचाहिँ भाडामा दिनु छाडेँ किनकि, तेह्रथुमे ढाका बुटिकले भाडामा दिएको लुगा नै बिक्री गर्छ भन्ने आरोप लाग्यो । त्यसैले अहिले फिल्म र भिडियोमा लागि भाडामा माग्नेहरूलाई बरु आधा मूल्य घटाएर बिक्री गर्ने गरेकी छु ।
बुटिक प्रमोशनका लागि नयाँ योजना के छ ?
अरुको इभेन्टहरु र शोहरुमा त गर्दै आइरहेकै छु । अबचाहिँ तेह्रथुमे ढाका बुटिकको नाममा एकल फेसन शो गर्ने सोच बनाएकी छु ।
