काठमाडौं । म्हेन्दोमाया गायिका रमला पाख्रिन तामाङले नयाँ गीत ल्याएकी छन् । रमलाले केही दिनअघि ‘म्हेन्दोरी लोई’ बोलको म्हेन्दोमाया गीत आफ्नो अफिसियल युट्युब च्यानलमार्फत सार्वजनिक गरेकी हुन् । ‘म्हेन्दोमाया साम्राज्ञी’को रुपमा समेत चिनिएकी रमलाको यो पछिल्लो गीतको भिडियोमा उनी आफैंले अभिनय गरेकी छन् ।
अढाई दशकदेखि नेपाली गीतसंगीत क्षेत्रमा क्रियाशील रमला ‘म्हेन्दोमाया’ गीतको संरक्षण र प्रवद्र्धन गर्ने आफ्नो उद्देश्य रहेको बताउँछिन् । २५ वर्षअघि ‘म्हेन्दोमायाँ युवा समाज’ नामक संस्था स्थापना भएको थियो, उनी त्यतिबेलादेखि ‘म्हेन्दोमाया’ गीतसंगीतमा लागेकी हुन् । रमलाले हालसम्म ६ सयभन्दा बढी गीत गाइसकेकी छन् ।
‘अहिलेसम्म जति गाएकी छ्ु, अधिकांश म्हेन्दोमाया गीत नै गाएकी छु’ रमला भन्छिन्, ‘धादिङ र नुवाकोटको भाकालाई प्रवद्र्धन र संरक्षण गर्ने मेरो उद्देश्य हो ।’ २०५६ सालमा ‘म्हेन्दोमाया’ गीतिसंग्रह ल्याएपछि औपचारिक गायनयात्रा प्रारम्भ गरेकी धादिङ खनियाबासकी रमला भन्छिन्, ‘सानैदेखि मलाई गीतसंगीतमा रुची थियो । रुचीसँगै म्हेन्दोमाया गायनयात्रा प्रारम्भ गरेकी हुँ । अहिले आएर म्हेन्दोमाया गायिकाकै रुपमा चिनिन पाउँदा खुसी छु ।’
पछिल्लो समय गण्डकीका अधिकांश जिल्लामा ‘म्हेन्दोमाया’ भाका गाइन्छ । तर, धादिङ र नुवाकोटमा गाइने ‘म्हेन्दोमाया’ भाकालाई मौलिक मानिन्छ । त्यही मौलिकता जोगाउनेक्रममै रमलाले आफूलाई ‘म्हेन्दोमाया गायिका’को पहिचान बनाउन सफल भएकी छन् ।
रमलाका ‘कतो तङच्यो रोमा’, ‘अम्बले अम्बले’, ‘लक्पर योन्दोङ’, कस्र्योल पोङ’, ‘साइकोले कोउ’, ‘सिङ्ल म्हने’ ‘गङजोरी तामर म्हेन्दो’, ‘रन्ता तपरीम’, र ‘म्हेन्दोमायाँ ब्याटल’जस्ता गीतहरु चर्चित छन् । दर्जनभन्दा बढी सोलो एल्बमकी गायिका रमलाले भनिन्, ‘२०५६ सालमा औपचारिक रुपमा गीतसंगीतमा लागेँ, त्यसपछि ६० को दशकमा आएर मेरो गीतहरु श्रोता तथा दर्शकले रुचाए । विशेषगरी मैले गाएको म्हेन्दोमाया भाका रुचाइएको छ ।’
‘म्हेन्दोमाया गायिका रमलाले गायनकै क्रममा दर्जनौं मुलुक भ्रमण गरिसकेकी छन् । पहिलो विदेशयात्रा दुवईबाट सुरु भएको बताउँदै उनले भनिन्, ‘हालसम्म दुवईसँगै कुवेत, कतार, कोरिया, मलेसिया, जापान, सिंगापुर, बेलायत, भारत, भुटान, थाइल्याण्डलगायत दर्जनौं देशको भ्रमण गरेकी छु ।’
