काठमाडौं । पदीय आचरण विपरित कार्य गर्ने एक सशस्त्र प्रहरी निरीक्षकलाई सशस्त्र प्रहरी बल, नेपाल प्रधान कार्यालयले कारवाही गरेको छ ।
एक विवाहित महिलासँगको नाजायज सम्बन्ध र त्यसले पारिवारिक जीवनमा खेलबाड गरेको भन्ने मुख्यालयमा उजुरी परेपछि आन्तरिक छानविन पछि सशस्त्र प्रहरी निरीक्षक राम चन्द्र खड्कालाई तीन वर्ष बढुवा रोक्का गरिएको हो ।
सशस्त्र प्रहरी बल, नेपाल नम्बर ११ गण रौतहटमा कार्यरत उनलाई सशस्त्र प्रहरी नियमावली २०७२ को परिच्छेद १३ को नियम ११२ को उपनियम (१) को खण्ड (ख) अनुसारको कसुरमा कारबाही भएको स्रोत बताउँछ । नियमावलीको नियम ११५ को उपनियम (१) को देहाय (६) ले दिएको अधिकार प्रयोग गरी कारवाही भएको हो । उनलाई २०८० जेष्ठ ८ गतेदेखि लागू हुने गरी ३ (तीन) वर्ष बढुवा रोक्काको कारवाही गरिएको छ ।
आफु विवाहित रहेका खड्का अर्काकी श्रीमतीसँग लागेर घरबार बिगारेको भनेर विभिन्न निकायमा उजुरी परेको थियो । त्यस विषयमा समाचारहरु समेत आएका थिए । त्यसपछि सशस्त्रले छानबिन गरी कारबाही गरेको हो ।
