काठमाडौं । पत्रकार एवं गीतकार सविता पोखरेलको शब्दरचना रहेको ‘एक चिम्टी सिन्दूर’ बोलको गीत सार्वजनिक भएको छ । प्रेमात्मक एवं भावनात्मक उक्त गीतको भिडियोलाई ‘म्यूजिक खबर’ नामक यूट्यूब च्यानलमार्फत् सार्वजनिक गरिएको हो ।
सरोज कोइरालाको संगीत रहेको ‘एक चिम्टी सिन्दूर’मा चर्चित गायिका अन्जु पन्तले स्वर दिएकी छन् । उक्त गीतका लागि संगीत संयोजन विष्णु अधिकारी र मिक्सिङ विप्लव अधिकारीले गरेका छन् ।
भिडियोमा लोकप्रिय कलाकार सागर लम्साल ‘बले’, अन्जली अधिकारी र समिक्षा क्षेत्रीको त्रिकोणात्मक कथा प्रस्तुत गरिएको छ । ‘एक चिम्टी सिन्दूर’ कोही लाएर रुन्छन्, कोही लाउन नपाएर रुन्छन् भन्ने भावभित्र मायाप्रेम, धोका र विश्वासघातका विषयलाई भिडियोमा चित्रण गरिएको छ । भिडियोमा नवराज उप्रेतीको छायाँकन र नविन उप्रेतीको सम्पादन रहेको छ । यस भिडियोलाई प्रकाश भट्टले निर्देशन गरेका हुन् ।
