काठमाडौं । तस्करीको सेटिङ मिलाएर अकुत आर्जन गरेका मधेस प्रदेशका घुमुवा प्रहरीहरू पहाडी तथा हिमाली जिल्लामा खेदिएका छन् । वर्षाैदेखि एकै ठाउँमा खटिएर तस्करहरुसँग मिलेको आरोपमा २९ जना प्रहरीलाई प्रहरी महानिरीक्षक बसन्त बहादुर कुँवरले त्यहाँबाट हटाएका हुन् ।
धेरैजसो सादा पोसाकमा खटिएर गैरव्यवसायिक गतिविधिमा संलग्न थिए । शुद्धीकरण अभियान अन्र्तगत प्रहरी नेतृत्वले उनीहरुलाई हटाएको हो । लामो समयदेखि पर्सामा कार्यरत वरिष्ठ नायब निरीक्षक विनोदकुमार सिंहलाई कालीकोट खटाइएको छ । बारामा कार्यरत सागरशमशेर जबरालाई रामेछाप खटाइएको छ ।
त्यस्तै, धनुषामा कार्यरत सइ नागेन्द्र राउत अहिरलाई संखुवासभा, सर्लाहीका रामरेख राय यादवलाई दोलखा, सप्तरीका सुरेशकुमार यादवलाई भोजपुरमा खटाइएको छ ।
अनुगमन प्रतिवेदन तथा अन्य स्रोतबाट आएका सूचनाका आधारमा उनीहरूलाई अन्यत्र जिल्लामा खटाइएको प्रहरी प्रवक्ता डिआइजी कुबेर कडायतले बताए ।
सीमा क्षेत्रमा क्षेत्रमा तस्करीलगायत विकृतिको छानबिन गर्न गत महिना प्रहरी प्रधान कार्यालयले चार एआइजीलाई चार प्रदेशमा गोप्य रूपमा खटाएको थियो ।
गत महिना एआइजी मीरा चौधरीको नेतृत्वमा मधेसका आठ जिल्लामा गोप्य अनुगमन भएको थियो । टोलीले लामो समयदेखि कार्यरत प्रहरीका कारण सीमा क्षेत्रमा तस्करीलगायत विकृति रहेको प्रतिवेदन दिएको थियो ।
सोही प्रतिवेदन कार्यान्वयन गर्ने क्रममा मधेसका केही प्रहरीलाई अन्यत्र खटाइएको प्रवक्ता कडायतले जानकारी दिए । गत १ असारमा २४ घन्टाको समय दिएर रवाना दिन निर्देशन दिइएको थियो । सोहीअनुसार उनीहरूलाई खटाइएको जिल्लामा रवाना गरिएको छ । तर, तराईमै फर्कन उनीहरुले चलखेल सुरु गरिसकेका छन् । उनीहरुको सम्पत्ति अनुसन्धान गरेमा अकुत आर्जन पुष्टि हुने प्रहरी अधिकारी बताउँछन् ।
उनीहरू राजनीतिक शक्ति केन्द्रको आडमा वर्षौँदेखि तराईका जिल्लामा कार्यरत थिए । पटक–पटक प्रहरी प्रधान कार्यालयमा उनीहरूविरुद्ध उजुरी परे पनि कारबाही हुन सकेको थिएन ।
सीमा क्षेत्रमा क्षेत्रमा तस्करीलगायत विकृतिको छानबिन गर्न गत महिना प्रहरी प्रधान कार्यालयले चार एआइजीलाई चार प्रदेशमा गोप्य रूपमा खटाएको थियो ।
कोसीमा टेकप्रसाद राई, लुम्बिनीमा टेकबहादुर तामाङ र सुदूरपश्चिममा सुदीप गिरीको नेतृत्वमा अनुगमन भएको थियो । अन्य प्रदेशको प्रतिवेदन पनि कार्यान्वयनको क्रममा रहेको प्रहरी प्रधान कार्यालयले जनाएको छ ।
को- को लखेटिए ?
