सिंगापुर । दुई लागुऔषध तस्करलाई यसै साता सिंगापुरमा फाँसी दिइने भएको छ । मृत्युदण्डको सजाय सुनाइएका दुई जनामा एक महिला पनि छन्, जसलाई फाँसी दिइनेछ । विशेष कुरा के छ भने २० वर्षपछि सिंगापुरमा एउटी महिलालाई फाँसी दिइन लागिएको हो । यो जानकारी सिंगापुरको एक मानवअधिकार संगठनले दिएको हो ।
५० ग्राम हेरोइनको तस्करीमा दोषी पाइएका ५६ वर्षीय पुरुषलाई बुधबार (जुलाई २६) फाँसी दिइने स्थानीय अधिकार संगठन ट्रान्सफर्मेटिभ जस्टिस कलेक्टिभ (टीजेसी) ले जनाएको छ। उनलाई दक्षिणपूर्वी एसियाली सहर राज्यको चांगी जेलमा फाँसी दिइनेछ ।
यससँगै लागुऔषध ओसारपसारमा दोषी ठहर भएकी ४५ वर्षीया महिलालाई शुक्रबार फाँसी दिइने छ । समाचार अनुसार दोषी महिलाको पहिचान सारीदेवी जमानीको रूपमा गरिएको छ। करिब ३० ग्राम हेरोइन तस्करी गरेको आरोपमा उनलाई २०१८ मा मृत्युदण्डको सजाय सुनाइएको थियो ।
स्थानीय अधिकारकर्मी कोकिला अन्नामलाईले यस्तो भएमा सन् २००४ पछि सिंगापुरमा फाँसी दिइने उनी पहिलो महिला हुने बताइन् । यसअघि ३६ वर्षीया महिलालाई लागुऔषध ओसारपसार गरेको आरोपमा फाँसी दिइएको थियो । टीजेसीका अनुसार दुबै कैदीहरू सिंगापुरका हुन् र उनीहरूका परिवारलाई मृत्युदण्डको सूचना प्राप्त भइसकेको छ ।
यसअघि २६ अप्रिलमा लागूऔषध तस्करीको आरोपमा सिंगापुरमा भारतीय मूलका एक व्यक्तिलाई फाँसी दिइएको थियो।
सिङ्गापुरमा विश्वको सबैभन्दा कडा लागुऔषध विरोधी कानून छ। लागुऔषध ओसारपसार गर्दा पक्राउ परे मृत्युदण्डको व्यवस्था छ । वास्तवमा सिंगापुर ५ सय ग्राम भन्दा बढी गाँजा वा १५ ग्राम भन्दा बढी हेरोइनको तस्करी फेला परेमा मृत्युदण्ड हुन सक्छ।
