न्युयोर्क । भारी वर्षाले न्युयोर्कमा बाढीको अवस्था सिर्जना भएको छ । शुक्रबार देखी परेको पानी पछिल्लो दशकमा एकै दिनमा भएको सबैभन्दा बढी हो ।
सहरका धेरै सब वे र रेल लाइनहरू बाढीले डुबानमा परेका छन् भने सामान्य जनजीवन प्रभावित भएको छ । सहरका धेरै तल्लो क्षेत्र पानीले भरिएका छन् ।
न्युयोर्कको लागार्डिया एयरपोर्टको टर्मिनल पनि बन्द गर्नु परेको छ । न्यूयोर्कको ब्रुकलिनमा करिब ७ इन्च पानी परेको अमेरिकी मौसमविद्हरूले बताएका छन् । केही स्थानमा एक घण्टामा साढे दुई इन्च पानी परेको थियो । जोन एफ केनेडी एयरपोर्ट क्षेत्रमा करिब आठ इन्च वर्षा भयो, जुन सेप्टेम्बर महिनाको रेकर्ड वर्षा हो।
यसअघि सन् १९६० मा डोना चक्रवातमा यति धेरै वर्षा भएको थियो । दुई वर्षअघि चक्रवाती आँधी इडाका कारण उत्तरपूर्वी क्षेत्रमा भारी वर्षाका कारण करिब १३ जनाको ज्यान गएको थियो । वर्षाका कारण अहिलेसम्म कुनै मानवीय क्षतिको खबर नआए पनि यसले जनताका दुई वर्ष पुरानो डरलाग्दो सम्झना पक्कै ताजा बनाएको छ ।
न्यूयोर्कका गभर्नर र मेयरले आपतकालको घोषणा गरेका छन् र मानिसहरूलाई प्रभावित क्षेत्रहरूबाट टाढा रहन अपील गरेका छन् । भारी वर्षाका कारण म्यानहट्टनबाट जाने मेट्रो–उत्तर रेलमार्ग बन्द गर्नु परे पनि साँझबाट पुनः सञ्चालनमा आएको थियो । सडकमा पानी जमेकाले सार्वजनिक यातायात पनि ठप्प भएको छ ।
