काठमाडौं । राष्ट्रसंघका महासचिव एन्टोनियो गुटेरेसले शान्ति प्रक्रिया टुंग्याउने कार्यमा नेपाल एक्लै नरहेको बताएका छन् ।
मंगलबार नेपालको संघीय संसदको दुवै सदनको संयुक्त बैठकलाई सम्बोधन गर्दै महासचिव गुटेरेसले यस्तो बताएका हुन् । उनले संक्रमणकालीन न्यायको माध्यमबाट मात्रै युद्वको घाउ निको हुने भन्दै यसलाई नाजुक र जटिल कार्यको रुपमा समेत चित्रण गरे ।
उनले भने‘ हामीलाई के कुरा थाहा छ भने संक्रमणकालिन न्यायमा सफलताको सबैभन्दा ठूलो सम्भावना हुन्छ। जब यो समावेशी तथा बृहत हुन्छ र यसको केन्द्रमा पीडितहरु हुन्छन्। जब यो सत्य, क्षतिपुर्ती र न्यायमा केन्द्रित हुन्छ। यसमा तपाईहरु एक्लो हुनुहुन्न। ’
गुटेरेसले नेपालको शान्ति प्रक्रियामा सहयोग गर्न पाउनु गौरवको विषय भएको बताएका छन् । महासचिव गुटेरेसले पछिल्लो २० वर्षयता नेपालको यात्रा हेर्नलायक रहेको पनि बताए । गुटेरेसले आफू दोस्रोपटक नेपाल आएको भन्दै यो देशको संस्कृति, सभ्यता र आतिथ्यले आफूलाई सधैं मोहित पारेको बताए । उनले आफू यसअघि सन् १९७८ मा पहिलो पटक नेपालमा आएको क्षणको स्मरणसमेत गरे ।
पूर्णपाठ
